बॉलिवूडचा दिग्गज अभिनेता इरफान खानचा मुलगा बाबिल खान आपल्या वडिलांची आठवण करून भावूक होत आहे. आज इरफान खानचा वाढदिवस आहे. इरफान खान आज जिवंत असता तर तो त्याचा 56 वा वाढदिवस साजरा करत असता. चाहत्यांच्या हृदयात इरफानचं वेगळं स्थान आहे, जे इतर कोणी घेऊ शकत नाही. इरफानच्या जाण्यानंतर त्याचा मुलगा बाबीलची प्रकृती बिघडली होती. बाबिलने एका मुलाखतीत वडिलांच्या निधनानंतरच्या त्याच्या स्थितीबद्दल सांगितले आहे.

वडील इरफान यांच्या निधनाबद्दल बोलताना अभिनेता बाबिलने एका मुलाखतीत सांगितले होते की, 'ज्यावेळी मी ही बातमी ऐकली तेव्हा माझा विश्वास बसत नव्हता. माझ्यासाठी हा सर्वात वाईट काळ होता आणि त्या वेळी मी संपूर्ण 45 दिवस स्वत:ला एका खोलीत कोंडून घेतले होते.

बाबिलने पुढे सांगितले की, 'त्यावेळी पप्पा शूटिंगमध्ये खूप व्यस्त असायचे. त्यांच्या मृत्यूनंतर, असे वाटायचे ते घरी उशिरा येतील. नंतर मला समजले की ते आता त्यांच्या कधीही न संपणाऱ्या शूटसाठी गेले आहे. मी माझ्या आयुष्यातील सर्वात चांगला मित्र गमावला आहे. हे असे दुःख आहे जे शब्दात व्यक्त करता येणार नाही.

वडिल इरफान खान यांच्या पावलावर पाऊल ठेवत बाबिलनेही चित्रपटसृष्टीत प्रवेश केला आहे. नुकताच बाबिलचा 'काला' हा चित्रपट प्रदर्शित झाला. ज्यामध्ये बाबिलच्या अभिनयाचे खूप कौतुक झाले होते. हा चित्रपट ओटीटी प्लॅटफॉर्मवर प्रदर्शित झाला आहे.