फेब्रुवारी म्हणजे प्रेमीयुगुलांचा महिना. ७ फेब्रुवारीपासून रोज डे, किस डे, चॉकलेट डे असे एकएक दिवस साजरे होतात आणि १४ फेब्रुवारी रोजी 'व्हॅलेंटाइन डे' साजरा केला जातो. व्हॅलेंटाइन वीकच्या निमित्ताने भाडिपामुळे (भारतीय डिजिटल पार्टी) प्रकाशझोतात आलेल्या सारंग साठ्येची हटके लव्हस्टोरी तुम्हाला सांगणार आहोत. 

सारंग आणि पॉला गेल्या सात वर्षांपासून एकत्र आहेत. 'टोरंटो फिल्म फेस्टिव्हल'ला एका पार्टीमध्ये या दोघांची पहिल्यांदा भेट झाली होती. नंतर सारंग आणि अनुषा एक कार्यक्रम करत असताना कॅनडाहून एक मुलगी येणार असल्याचं समजलं. तिला भेटल्यावर कुठेतरी आधी पाहिल्याचं सारंगला पुसट आठवत होतं. पण पॉलाला मात्र टोरंटोला भेटल्याचं नीट आठवत होतं. त्यावेळी पॉलाला मराठी बोलता आणि समजता येत नसल्यानं सारंगच्या मित्रांनी त्याला कॅनडाहून सारंगची चाहती आली आहे, अशी चिडवाचिडवी सुरू केली. 

हेही वाचा : जाणून घ्या, मितालीने लग्नातल्या साड्यांची शॉपिंग कुठून केली?

सारंगला पहिल्याच भेटीत पॉला आवडली होती. तिच्याशी बोलताना मराठीतून फ्लर्ट केलेलं अजूनही मला आठवतं, असं सारंगने एका मुलाखतीत सांगितलं होतं. पॉलाचे विचार, तिची काम करण्याची पद्धत हळूहळू सारंगला आवडायला लागली. या भेटीनंतर एकाच महिन्यात दोघांनी एकत्र राहण्याचा निर्णय घेतला. सारंग, पॉला आणि अनुषा पुण्यात घर घेऊन एकत्र राहायला लागले. त्याआधी सारंगने घरी त्याच्या आई-वडिलांना पॉलासोबतच्या नात्याची कल्पना दिली होती. गेल्या सात वर्षांपासून हे दोघं एकत्र राहत आहेत. घरातील सगळ्या गोष्टी, काम, घरखर्च हे दोघं विभागून घेतात. 

पॉलाविषयी सारंगने एका मुलाखतीत सांगितलं, "ती वयाच्या अठराव्या वर्षी जपानला फिरून आली. कुठल्याही संस्कृतीत ती लवकर मिसळून जाते. भाडिपा (भारतीय डिजिटल पार्टी) हे तिचं बाळ आहे. कारण हे सुरू करण्याची संकल्पना तिची होती."