भाऊ कदम हे मराठी मनोरंजन विश्वातील विनोदी अभिनयासाठी प्रसिद्ध असलेले कलाकार. भाऊ कदम यांनी आजवर चला हवा येऊ द्याच्या माध्यमातून प्रेक्षकांचं चांगलं प्रेम मिळवलं. काही दिवसांपुर्वी भाऊ कदम चांगले चर्चेत आले होते.

भाऊ कदम आणि अशोक सराफ यांचा एक व्हिडीओ व्हायरल झाला होता. या व्हिडीओत अशोक सराफ यांनी भाऊ कदम यांना बराच वेळ उभं ठेवलं, बसायला सांगितलं नाही म्हणुन प्रेक्षकांनी नाराजी व्यक्त केली होती. आता या संपूर्ण प्रकरणावर स्वतः भाऊ कदम यांनी मौन सोडलंय.

(bhau kadam reaction about ashok saraf viral video)

भाऊ कदम यांनी दिलं स्पष्टीकरण

भाऊ कदम यांनी त्यांच्या व्हिडीओवर आलेल्या लोकांच्या कमेंट्स वाचल्या. आणि अखेर त्यांनी एका वृत्तसंस्थेला दिलेल्या मुलाखतीत या प्रकरणाबद्दल मौन सोडलंय. भाऊ कदम यांच्या म्हणण्यानुसार...

त्या दिवशी त्यांच्या नाटकाचा प्रयोग होता. तेव्हा त्यांना कळलं की अशोक मामा मेकअप रुममध्ये बसले आहेत. ते लगेचच मामांना भेटायला गेले.

भाऊ कदम का बसले नाहीत, हे आहे कारण

भाऊ कदम पुढे म्हणाले, त्यादिवशी त्यांना नाटकाच्या प्रयोगानंतर निघायची घाई होती. भाऊंना चला हवा येऊ द्या च्या शूटींगला जायचं होतं. त्यामुळे त्यांनी उभं राहणं पसंत केलं. याशिवाय त्यांनी मामांची विचारपूस केली.

अशोक सराफ यांच्यासारख्या मोठ्या व्यक्तिमत्वासमोर उभं राहण्याची आमची पात्रता नाही. ते खूप मोठे कलाकार आहेत. जर मी त्यांच्या घरी असतो तर त्यांनी मला नक्कीच बसायला सांगितलं असतं. चहा वगैरे विचारला असता.

अशोक सराफ यांच्याविषयी मला नितांत आदर, गैरसमज पसरवू नका

भाऊ कदम यांनी शेवटी सांगितलं की, "त्यांना अशोक सराफ यांच्याविषयी नितांत आदर आहे. अशोक सराफ यांना भाऊ कदम खूप मानतात. त्यामुळे चुकीची अर्धवट आणि खोटी माहिती लोकांनी पसरवू नये. याशिवाय गैरसमज पसरवू नये". असं आवाहन भाऊ कदम यांनी केलंय.