Akanksha Dubey: भोजपुरी अभिनेत्री आकांक्षा दुबेच्या आत्महत्येनंतर अख्खी इंडस्ट्री हादरली होती. आकांक्षा दुबे २५ मार्च रोजी रात्री वाराणसी येथील सारनाथच्या सोमेंद्र हॉटेलमधील रुममध्ये मृत अवस्थेत सापडली होती.

बोललं जातं की आकांक्षा दुबेनं गळफास घेत आत्महत्या केली होती. आता याच दिवशीच्या रात्रीचा थरार सांगणारा सीसीटीव्ही फूटेज समोर आलं आहे. ज्यामध्ये रात्री उशिरा दीड वाजता आकांक्षा कारमधून उतरून हॉटेलच्या दिशेनं चालताना दिसत आहे. (Bhojpuri Actress Akanksha Dubey Death New CCTV Footage)

जवळपास ४ मिनिटं ४० सेकंदाचा सीसीटीव्ही फुटेज आता समोर आला आहे. या फूटेजमध्ये आकांक्षा कार मधून एका व्यक्तीसोबत उतरते आणि हॉटेलच्या आत जाताना दिसत आहे. यानंतर ती हॉटेलचे जीने चढताना दिसत आहे. ते चढताना आकांक्षा गॅलरीमध्ये थांबते आणि बॅगेत काहीतरी शोधताना दिसत आहे.

मध्ये-मध्ये तिच्यासोबत असलेला तो माणूसही तिला मदत करताना दिसत आहे. व्हिडीओमध्ये पाहून तरी असं दिसत आहे की ती जे काही बॅगेत शोधतेय तेव्हा चिंताग्रस्त आहे कारण ते तिला सापडत नाहीय.

आणि त्याच अवस्थेत ती हॉटेलच्या रुमच्या दिशेनं चालतेय. तो माणूस देखील तिच्या मागे मागे जातोय. बोललं जात आहे की या व्हिडीमुळे पोलिसांना आकांक्षा दुबेच्या मृत्यूचा गुंता सोडवायला मदत होईल.

आकांक्षा शेवटची याच सीसीटीव्ही फूटेज मध्ये दिसत आहे. पोलिस सध्या या केसच्या तपासात व्यस्त आहेत आणि वाटतंय की हे सीसीटीव्ही फूटेज आता पोलिसांना आकांक्षाची केस सोडवण्यास मदत करू शकते.

आकांक्षा दुबेच्या आईच्या तक्रारीनंतर भोजपुरी गायक आणि अभिनेता समर सिंग आणि त्याचा भाऊ संजय सिंग यांच्या विरोधात ३०६ अॅक्ट अंतर्गत केस दाखल करण्यात आली आहे.

आकांक्षा तिच्या निधनाच्या ठिक २ दिवस आधी या हॉटेलमध्ये थांबली होती. आकांक्षा एका सिनेमाच्या शूटिंगसाठी वाराणसी येथे गेली होती.

हॉटेल मॅनेजरनं सांगितलं की आकांक्षा दुबे २५ तारखेला रात्री जवळपास ८ वाजता हॉटेलमधून एका पार्टीत सामिल होण्यासाठी निघाली होती आणि जवळपास दीड वाजता ती हॉटेलमध्ये परतली. यादरम्यान आकांक्षासोबत एक माणूस होता. रिपोर्टनुसार,आकांक्षा जेव्हा पुन्हा हॉटेलमध्ये परतली तेव्हा ती मद्यधुंद अवस्थेत होती.