हिजाब (Hijab) वरुन सुरू असलेला वाद आता संपूर्ण देशात पेटून उठला आहे. कर्नाटक मधील शिवमोंगा इथनं सुरू झालेला हा वाद आता राज्या-राज्यात आपलं डोकं वर काढीत आहे. आता तर बॉलीवूड(Bollywood) मध्येही याचे पडसाद उमटले आहेत. 'बिग बॉस ११' मध्ये दिसलेली महजबी सिद्दिकी(Mehjabi Siddiqui) हिनं तर एक घोषणा करून सगळ्यांना चकीत करून सोडलं आहे. तिनं सोशल मीडियावर एक पोस्ट करीत म्हटलं आहे की,''मी ईस्लाम धर्मासाठी बॉलीवूडला सोडत आहे. मी हिजाबचं समर्थन करीत आहे. मी अल्लाहच्या मार्गावर यापुढे चालेन''. असंही तिनं त्या पोस्टमध्ये म्हटलं आहे.

महजबी सिद्दिकीनं पोस्टमध्ये लिहिलं आहे,''मी हे यासाठी लिहित आहे कारण दोन वर्षांपासून मी खूप टेन्शनमध्ये होती,मला काहीच समजत नव्हतं की मी असं काय करू,ज्यामुळे मला शांती मिळेल...देवाच्या विरोधात जाऊन कधीच कोणी माणूस सुखी राहू शकला नाही. तुम्ही लोकांना खूश ठेवण्याचा कितीही प्रयत्न केलात तरी ते कधी मनापासून खूश नाही राहू शकत. यापेक्षा तर आपल्या वागण्यानं देवाला आनंद मिळेल अशी गोष्ट करणं कधीही उत्तम. मी सना खानला एक वर्षापासून सोशल मीडियावर फॉलो करत आहे. मी तिनं आत्मसात केलेल्या विचारांनाही फॉलो करत आहे. आणि तसं केल्यामुळे मला आनंद,समाधान मिळत आहे,देव मला अशाच सन्मार्गावर चालत राहण्याची सदबुद्धी देवो.''

महजबी सिद्दिकीच्या आधी सना खान आणि जायरा वसीम यांनी ईस्लाम धर्मासाठी ग्लॅमर वर्ल्डपासून लांब जाण्याचा निर्णय घेतला होता. कधीकाळी बोल्ड ड्रेसेसमध्ये दिसणारी सना आता आपल्याला हिजाब मध्ये दिसते. ती नेहमी हिजाब मधील पेहरावासोबतच आपले फोटो सोशल मीडियावर पोस्ट करीत असते. तर जायरा वसीमचं म्हणणं आहे की,''ईस्लाम धर्मात हिजाब स्त्रियांसाठी चॉइस नाही तर ड्युटी आहे''. आता ही सारी वक्तव्य अशावेळेस समोर येत आहेत जेव्हा पूर्ण देशात हिजाब वरुन सुरू असलेला वाद कळीचा मुद्दा बनत चालला आहे. आता हे प्रकरण कोर्टात पोहोचलंय. त्यामुळे या नवनवीन घोषणा हा वाद आणखीनच चिघळवत आहेत,असंच चित्र दिसतंय.