Renuka Shahane: बॉलीवूडचा 'हम आपके है कौन' सारखा सुपरहिट सिनेमा दिल्यानंतर रेणुका शहाणे रातोरात स्टार झाल्या हे आता काही नव्यानं सांगायची गरज नाही. मोठ्या पडद्यावर नेहमीच त्यांनी आपल्या अभिनयाच्या जादूनं चाहत्यांना मंत्रमुग्ध केलं. १६ डिसेंबरला डिस्ने हॉट स्टारवर त्यांनी अभिनय केलेला 'गोविंदा नाम मेरा' हा कॉमेडी सिनेमा रिलीज झाला आहे. (Bollywood: Renuka Shahane faced rejection after audition)

या सिनेमातील रेणुका शहाणे यांची भूमिका नेहमीपेक्षा एकदम वेगळी आहे. २ तासाच्या या सिनेमात त्यांनी आपल्या अभिनयाच्या अनेक छटा प्रेक्षकांना दाखविल्या आहेत. मोठ्या ब्रेकनंतर पडद्यावर कमबॅक करणाऱ्या रेणुका शहाणे यांनी या दरम्यान रीजेक्शनचा सामना केला. याचा खुलासा स्वतः रेणुका शहाणे यांनी केला आहे. आणि इतक्या वर्षाने असं का घडतंय यावर देखील अभिनेत्रीनं भाष्य केलं आहे.

'गोविंदा नाम मेरा' या सिनेमात रेणुका शहाणे यांनी विकी कौशल,कियारा अडवाणी आणि भूमी पेडणेकरसोबत स्क्रीन शेअर केली आहे. त्यांच्या कामाची खूप प्रशंसा देखील होत आहे. आता एका वृत्तपत्राला दिलेल्या मुलाखतीत त्यांनी बरेच खुलासे केले आहेत. त्यांनी आपल्या वाट्याला येणाऱ्या रीजेक्शनवर भाष्य केलं आहे. ऑडिशन झाल्यानंतर आपल्याला अनेकदा रीजेक्ट केल्याचं त्या म्हणाल्या.

रेणुका शहाणे यांचे म्हणणे आहे की,ऑडिशननंतर रीजेक्ट होणं या गोष्टी अनेकदा माझ्यासोबत गेल्या काही काळात घडल्या. मी दिग्दर्शकाच्या माध्यमातून माझ्या भूमिकेला समजून घेणं गरजेचं आहे असं समजते पण आजकाल कास्टिंग डायरेक्टर्सचे असिस्टंट या ऑडिशन घेतात. आणि मला त्यांची काम करण्याची पद्धत कळतच नाही.आणि मग माझ्या वाट्याला रीजेक्शन येतं.

रेणुका शहाणे पुढे म्हणाल्या,'' या ऑडिशन्समध्ये मी माझे १०० टक्के देत नाही, पण मी रीजेक्शनला गंभीरतेने देखील घेत नाही. मला नाही वाटत की मी चांगली अभिनेत्री नाही. कारण मी एक दिग्दर्शिका देखील आहे. मला माझ्या एखाद्या भूमिकेसाठी अनेकदा इतर कलाकार पसंत येतात,पण याचा अर्थ असा नाही की रीजेक्शन वाट्याला आलेल्या कलाकारांना अभिनय येत नाही. 'गोविंदा मेरा नाम' साठी मला समोरून कॉल आला होता. त्यांना वाटत होतं की विक्कीच्या आईची भूमिका मी करावी''.