अश्लील चित्रफितींची निर्मिती व प्रसारणप्रकरणी अटकेत असलेल्या राज कुंद्राला न्यायालयाने मंगळवारी १४ दिवसांची न्यायालयीन कोठडी सुनावली. हॉटशॉट या अ‍ॅपद्वारे कुंद्राने अश्लील चित्रफितींचे चित्रण केले. याप्रकरणी एका मॉडेलने सोशल मीडियावर व्हिडीओ पोस्ट करत, अनेक बॉलिवूड अभिनेत्रींना कुंद्राने त्याच्या अ‍ॅपसाठी विचारलं होतं असं धक्कादायक विधान केलं. यामध्ये तिने सेलिना जेटली, किम शर्मा, नेहा धुपिया, अर्शी खान, नोरा फतेही, स्कार्लेट रोझ यांची नावं घेतली होती. त्यावर आता अभिनेत्री सेलिना जेटलीच्या प्रवक्त्याने स्पष्टीकरण दिलं आहे. (Celina Jaitley clarification on Raj Kundras HotShots app slv92)

'सेलिना जेटलीला शिल्पा शेट्टीच्या जेएल स्ट्रीम या अ‍ॅपसाठी विचारण्यात आलं होतं. शिल्पाचं हे अ‍ॅप सोशल मीडिया इन्फ्लुएन्सर्ससाठी आहे. सेलिनाला हॉटशॉट्ससाठी विचारण्यात आलं नव्हतं. तिला त्या अ‍ॅपविषयी माहितीसुद्धा नाही. शिल्पा ही सेलिनाची खूप चांगली मैत्रीण आहे आणि त्यामुळेच शिल्पाने तिला तिच्या अ‍ॅपसाठी काम करण्याविषयी विचारलं होतं. मात्र इतर कामाच्या व्यापामुळे सेलिना शिल्पा शेट्टीच्या अ‍ॅपसाठी काम करू शकली नव्हती. फक्त सेलिनाच नाही तर इतर बॉलिवूड अभिनेत्रींनाही त्या अ‍ॅपसाठी विचारण्यात आलं होतं', असं सेलिनाच्या प्रवक्त्याने स्पष्ट केलं.

कुंद्राला मुंबई पोलिसांनी १९ जुलैला अटक केली होती. हॉटशॉट या अ‍ॅपद्वारे ऑगस्ट ते डिसेंबर २०२० या चार महिन्यांत अ‍ॅपल कंपनीकडून कुंद्राला १ कोटी १७ लाख रुपयांचे उत्पन्न मिळाले होते. तर गुगल प्लेस्टोरवरील अ‍ॅपचे त्याचे सर्वाधिक युझर्स होते. त्यातून गुगलकडून मोठा महसूल त्याला मिळाल्याची शक्यता आहे. याबाबत पोलिसांनी गुगलकडून माहिती मागविली आहे.