‘हर हर महादेव’ चित्रपटावर इतिहासाची मोडतोड केल्याचा आरोप करण्यात आला होता. तसेच संभाजी ब्रिगेडकडून चित्रपटातील काही दृश्यांवर आक्षेप घेत ते चित्रपटातून काढून टाकण्याची मागणी केली होती. त्यांच्या या मागणीला अखेर यश मिळालं आहे.

‘हर हर महादेव’ या चित्रपटात दाखवलेल्या अनेक घटनांना ऐतिहासिक संदर्भ नाहीत. त्यामुळे यात त्रुटी आहेत, असे सांगत चित्रपटावर बाजीप्रभू देशपांडे यांच्या वंशजांकडून देखील आक्षेप घेण्यात आला होता. यानंतर संभाजी ब्रिगेडने चित्रपटातून हे दृश्य काढून टाकावेत ही मागणी लावून धरली होती. त्यानंतर आता चित्रपटात्या निर्मात्यांकडून मोठा निर्णय घेण्यात आला आहे.

त्यानुसार हर हर महादेव चित्रपटातील वादग्रस्त प्रसंग आता वगळण्यात येणार आहेत. संभाजी ब्रिगेडकडून याबद्दलची मागणी करण्यात आली होती. या मागणीला आता यश आलं आहे.

संभाजी ब्रिगेडचे पदाधिकारी आणि चित्रपटाते निर्माते ‘झी स्टुडिओ’च्या पदाधिकाऱ्यांची बैठक झाली. या बैठकीत या चित्रपटातून वादग्रस्त प्रसंग वगळण्याचा निर्णय घेण्यात आला अशी माहिती संभाजी ब्रिगेडकडून देण्यात आली आहे. या निर्मयानंतर हा वाद शमेल अशी अपेक्षा व्यक्त केली जात आहे.

हेही वाचा - संयुक्त नावावरील गृहकर्जातून होईल प्राप्तीकराची बचत...

चित्रपटावर बाजीप्रभू देशपांडे यांच्या वंशजांनी नोंदवलेले आक्षेप -

- बाजीप्रभू देशपांडे हे छत्रपती शिवाजी महाराजांचा एकेरी उल्लेख करत असल्याचे दाखवले आहे, हे खटकणारे आहे.

- शिरवळ येथे समुद्र असल्याचे दाखवले आहे, मात्र तेथे नदी आहे. तिथे त्याकाळी इंग्रजांचे प्राबल्य देखील नव्हते.

- बाजीप्रभू आणि फुलाजीप्रभू देशपांडे या भावंडांमधील लहानपणीच्या कटू प्रसंगांनाही कोणताही ऐतिहासिक आधार नाही.

- अफजलखानाच्या वधाप्रसंगी बाजीप्रभू देशपांडे हजर असल्याचे चित्रपटात दाखवले आहे, मात्र वास्तविक तेव्हा बाजीप्रभू तेथे नव्हते.

- बाजीप्रभू देशपांडे आणि बांदल देशमुख यांच्यात भलत्याच कारणावरून वाद झाल्याचे दाखवण्यात आले आहे.