बॉलिवूडमधील सर्वाधिक चर्चेत असलेल्या जोड्यांपैकी एक म्हणजे अभिनेता रणवीर सिंह व दीपिका पदुकोण. या दोघांची लव्हस्टोरी ते लग्नापर्यंतचा प्रवास सर्वश्रुत आहे. २०१२ मध्ये या दोघांची पहिल्यांदा भेट झाली आणि त्यानंतर सहा वर्षे दोघांनी एकमेकांना डेट केलं. रणवीरने दीपिकाला लग्नासाठी प्रपोज तर केलं होतं, मात्र भूतकाळातील काही अनुभवांमुळे दीपिका लग्नाला होकार द्यायला कचरत होती. अखेर २०१८ मध्ये या दोघांनी लग्न केलं. इथपर्यंतची गोष्ट तर अनेकांना ठाऊक असेलच. पण तुम्हाला हे माहितीये का, की रणवीर-दीपिकाने लग्नाच्या चार वर्षांपूर्वीच साखरपुडा केला होता. रणवीरने दीपिकाला प्रपोज केल्याच्या दोन वर्षांनंतर या दोघांनी गुपचूप साखरपुडा उरकला होता. 

याबाबतचा खुलासा खुद्द दीपिकाने 'फिल्मफेअर'ला दिलेल्या मुलाखतीत केला. "हे कोणालाच माहित नाही. लग्नाच्या चार वर्षांपूर्वीच आमचा साखरपुडा पार पडला होता. या कार्यक्रमाला दोघांचे पालक आणि भाऊ-बहीणच उपस्थित होते", असं सांगत दीपिकाने चाहत्यांना धक्काच दिला. या दोघांचा साखरपुडा जरी छोटेखानी समारंभात पार पडला असला तरी लग्न मात्र धूमधडाक्यात झालं. 

हेही वाचा : आरोह वेलणकर झाला बाबा! चाहत्यांना सांगितली आनंदाची बातमी

इटलीमध्ये कोकणी आणि सिंधी अशा दोन पद्धतींनी रणवीर-दीपिकाचा विवाहसोहळा पार पडला. या दोघांनी संजय लीला भन्साळी दिग्दर्शित 'रामलीला' आणि 'पद्मावत' या चित्रपटांमध्ये काम केलं. 'रामलीला'च्या सेटवरच या दोघांमध्ये प्रेमाची कळी फुलत होती. आता लग्नानंतर ही दोघं पुन्हा एकदा '८३' या चित्रपटाच्या निमित्ताने एकत्र काम करणार आहेत. या चित्रपटात हे दोघं ऑनस्क्रीनसुद्धा पती-पत्नीच्या भूमिकेत पाहायला मिळणार आहेत.