संजय लीला भन्साळी दिग्दर्शित 'गंगुबाई काठियावाडी' हा बहुचर्चित आणि बहुप्रतिक्षित चित्रपट लवकरच प्रेक्षकांच्या भेटीला येणार आहे. या चित्रपटात अभिनेत्री आलिया भट्ट ही गंगुबाईंची भूमिका साकारतेय. काही दिवसांपूर्वीच चित्रपटाचा ट्रेलर प्रदर्शित झाला होता आणि या ट्रेलरमधील आलियाच्या अभिनयाचं फारच कौतुक झालं. मात्र आता आलियाची खास मैत्रीण दीपिका पदुकोण ही दिग्दर्शक भन्साळींवर नाराज झाल्याचं समजतंय. 'स्पॉटबॉय ई'ने दिलेल्या वृत्तानुसार, गंगुबाईच्या भूमिकेची ऑफर न दिल्याने दीपिका भन्साळींवर नाराज झाली आहे. दीपिका ही भन्साळींची सर्वांत आवडती अभिनेत्री असल्याचं म्हटलं जातं. 'राम लीला', 'बाजीराव मस्तानी' आणि 'पद्मावत' या चित्रपटांमध्ये दोघांनी एकत्र काम केलं होतं.  

चित्रपटातील मुख्य भूमिकेची ऑफर आलियाला दिल्यानंतर भन्साळींनी त्यात दीपिकाला एका गाण्यापुरती झळकण्याची संधी दिली होती असं म्हटलं जातंय. मात्र दीपिकाने या संधीला साफ नकार दिला. विशाल भारद्वाज यांच्या 'सपना दीदी' या चित्रपटात दीपिका महिला गँगस्टरची भूमिका साकारत असल्याने भन्साळींनी तिला गंगुबाईच्या भूमिकेची ऑफर दिलीच नाही, अशी माहिती संजय लीला भन्साळींच्या निकटवर्तीयांनी दिली. दीपिका सध्या शकुन बत्राच्या भूमिकेसाठी तयारी करत आहे. यामध्ये तिच्यासोबत अनन्या पांडे आणि सिद्धार्थ चतुर्वेदी काम करणार आहेत. तर आलिया 'गंगुबाई काठियावाडी' या चित्रपटाच्या प्रदर्शनासाठी सज्ज झाली आहे.

हेही वाचा : आता अशी दिसते 'हेरा फेरी'मधली रिंकू; साकारली होती देवीप्रसादच्या नातीची भूमिका

कोण होत्या गंगुबाई काठियावाडी?
दिग्दर्शक भन्साळींना हुसैन झैदी यांच्या 'माफिया क्वीन्स ऑफ मुंबई' या पुस्तकातून गंगुबाई हे पात्र सापडलं. गंगुबाई या कामाठीपुऱ्यात वेश्या व्यवसाय करत होत्या. त्या मूळच्या गुजरातच्या होत्या. वयाच्या अवघ्या १६व्या वर्षी प्रेमविवाह करून त्या मुंबईला पळून आल्या होत्या. मात्र त्यांच्या पतीने केवळ ५०० रुपयांसाठी त्यांना वेश्या व्यवसायात ढकललं. कामाठीपुरात वेश्या व्यवसाय करताना गंगुबाईंचा अनेक गँगस्टरशी संपर्क आला. अशाच एका प्रसंगात त्यांची गाठ करीम लालाशी पडली आणि त्यांनी त्याला राखी बांधत भाऊ मानलं. त्या घटनेनंतर करीम लालाने अवघा कामाठीपुराच गंगुबाईंच्या हातात दिला, असं म्हटलं जातं.