Dharmaveer 2 News: धर्मवीर २ सिनेमाची सर्वांना उत्सुकता आहे. २०२२ ला आलेल्या धर्मवीर सिनेमाने बॉक्स ऑफीसवर सुपरहिट कामगिरी केली. धर्मवीर सिनेमात आनंद दिघेंची कहाणी पाहायला मिळाली. आनंद दिघेंच्या आयुष्यातले महत्वाचे टप्पे सिनेमात पाहायला मिळाले.

आज धर्मवीर २ ची सुद्धा घोषणा झालीय. धर्मवीर २ चा मुहूर्तसोहळा आज पार पडला. यावेळी सिनेमाची संपूर्ण टीम उपस्थित होती.

धर्मवीर २ चा मुहूर्त सोहळा

धर्मवीर २ सिनेमाच्या शुटींगचा मुहूर्तसोहळा पार पडला. यावेळी आनंद दिघेंच्या तसबिरीला वंदन करण्यात आलं. आणि अंबेमातेची आरती करण्यात आली. मुख्यमंत्री एकनाथ शिंदेंनी या सोहळ्याला विशेष उपस्थिती दर्शवली. त्यांनी आनंद दिघेंसमोर हात जोडले आणि आरती केली.

धर्मवीर २ च्या शुटींग मुहूर्ताला अभिनेता प्रसाद ओक, सिनेमाचे दिग्दर्शक प्रवीण तरडे आणि निर्माते मंगेश देसाई उपस्थित होते. सर्व कलाकारांनी प्रार्थना करुन सिनेमाच्या शुटींगला सुरुवात केली.

धर्मवीर 2 ची घोषणा...

दिग्दर्शक प्रवीण तरडेंनी यांनी काही दिवसांपुर्वी पोस्टर शेअर करत धर्मवीर 2 ची घोषणा केलीय. "अनेक दिवसांपासून सुरु असलेली चर्चा आता प्रत्यक्षात उतारणार.... सांगण्यास अतिशय आनंद होत आहे की, जेजुरी येथील खंडोबाचे दर्शन घेऊन आज तुमच्या सर्वांच्या प्रेमाने आणि आशीर्वादने 'धर्मवीर 2' ची आज मी अधिकृत घोषणा करत आहे.

पहिल्या भागात आनंद दिघे साहेबांची अखंड राजकीय कारकीर्द प्रेक्षकांना पाहायला मिळाली होती, ज्यात शेवटी दिघे साहेबांचे निधन झाल्याचे दाखवल्यामुळे आता दुसऱ्या भागात नेमके काय पाहायला मिळणार असा प्रश्न प्रेक्षकांना नक्कीच पडला असेल!

"धर्मवीर २' मधून उलगडणार 'साहेबांच्या हिंदुत्त्वाची गोष्ट..." असं कॅप्शन देत धर्मवीर 2 ची घोषणा झाली. हा सिनेमा पुढच्या वर्षी २०२४ ला प्रेक्षकांच्या भेटीला येणार आहे.