अत्यंत वेगळं कथानक घेऊन 'अग्गंबाई सासूबाई' ही मालिका प्रेक्षकांच्या भेटीला आली होती. अल्पावधीतच या मालिकेने व त्यातील कलाकारांनी प्रेक्षकांची मनं जिंकली. मालिकेतील बबड्या हे पात्र कितीही नकारात्मक असलं तरी त्याची भूमिका साकारणाऱ्या अभिनेता आशुतोष पत्कीला चांगली ओळख मिळाली. आता ही मालिका प्रेक्षकांचा निरोप घेणार असून एका नव्या रुपात व नव्या कथानकासह प्रसारित होणार आहे. 'अग्गंबाई सासूबाई' हे नाव बदलून आता 'अग्गंबाई सूनबाई' या नावाने मालिका प्रेक्षकांच्या भेटीला येणार आहे. यातील काही कलाकारसुद्धा बदलल्याचं पाहायला मिळतंय. 

या नव्या मालिकेचा प्रोमो काही दिवसांपूर्वी सोशल मीडियावर प्रदर्शित करण्यात आला. त्यामध्ये आसावरीची भूमिका साकारणाऱ्या निवेदिता सराफ व अभिजीत यांची भूमिका साकारणारे गिरीश ओक मालिकेत तसेच आहेत. मात्र आसावरीच्या भूमिकेत बरेच बदल करण्यात आले आहे. नेहमी घाबरून राहणारी आसावरी आता चक्क व्यावसायिका झाली आहे. तर दुसरीकडे त्यांची सून शुभ्राच्या भूमिकेत अभिनेत्री तेजश्री प्रधानऐवजी उमा पेंढारकर दिसली. शुभ्राची भूमिका बदलल्याने बबड्याचीसुद्धा बदलणार का, असा प्रश्न प्रेक्षकांना पडला होता. तर बबड्याचीही भूमिका बदलली असून आता अभिनेता अद्वैत दादरकर ही भूमिका साकारणार आहे. 

हेही वाचा : धक्कादायक! मराठी मालिकेतील अभिनेत्रीला अज्ञातांकडून मारहाण

अद्वैतने 'माझ्या नवऱ्याची बायको' या मालिकेत सौमित्रची भूमिका साकारली होती. एकीकडे ही मालिका संपत असताना अद्वैत मात्र 'अग्गंबाई सूनबाई'मधून पुन्हा एकदा नव्या रुपात प्रेक्षकांच्या भेटीला येणार आहे. अद्वैतने साकारलेल्या सौमित्रच्या भूमिकेलाही प्रेक्षकांकडून भरपूर प्रेम मिळालं. 'अग्गंबाई सूनबाई' ही नवीन मालिका आता सूनबाईच्या दृष्टीकोनातून असल्याने त्यात काय नवीन बदल होतील आणि ते प्रेक्षकांना आवडेल का, हे पाहणं औत्सुक्याचं ठरणार आहे.