प्रसिद्ध अभिनेते फिरोज खान यांचा मुलगा आणि अभिनेता फरदीन खान हा चित्रपटसृष्टीपासून जरी लांब असला तरी आता एका विशेष कारणासाठी तो प्रकाशझोतात आला आहे. मुंबईतील एका हेअर सलूनमधून बाहेर पडताना फरदीनला पाहिलं गेलं आणि सर्वांना आश्चर्याचा धक्काच बसला. फरदीनने त्याचं वजन बरंच कमी केलं असून त्याचा फिट अंदाज सोशल मीडियावर चर्चेचा विषय ठरतोय. फरदीन इंडस्ट्रीपासून दूर आहे. मध्यंतरीच्या काळात त्याचे काही फोटो व्हायरल झाले होते, ज्यामध्ये त्याचं वजन बरंच वाढलेलं दिसत होतं. पण आता पुन्हा एकदा पहिल्या रुपात पाहायला मिळतोय. त्याचं हे ट्रान्सफॉर्मेशन चाहत्यांना फारच आवडलं असून त्याने वजन कमी कसं केलं, असा प्रश्न नेटकरी विचारत आहेत. 

'बॉम्बे टाइम्स'ला दिलेल्या मुलाखतीत फरदीन त्याच्या फिटनेसविषयी म्हणाला, "मानसिक स्वास्थ्याचा परिणाम थेट तुमच्या शारीरिक स्वास्थ्यावरही होतो. माझ्या कठीण काळात मुलगी डियाना आणि मुलगा अझारियस यांनी माझी खूप मदत केली. माझ्या मुलीला स्केटिंग, सायकलिंक आणि माझ्या मुलाला बागेत पळायला खूप आवडतं. वडील म्हणून मलासुद्धा त्यांच्यासोबत विविध खेळ खेळायची, फिरायला जायची आवड होती. पण या गोष्टी करण्यासाठी फिट राहणं सर्वांत महत्त्वाचं होतं. त्यामुळे पत्नी नताशाच्या मदतीने मी माझं वजन कमी केलं", असं त्याने सांगितलं. 

हेही वाचा : फाटक्या जीन्सचं उत्तर बिकिनीने; आयुषमानच्या पत्नीचा फोटो व्हायरल

फरदीन खानने नव्वदच्या दशकात 'प्रेम अगन' या चित्रपटातून बॉलिवूडमध्ये पदार्पण केलं. या चित्रपटासाठी त्याला सर्वोत्कृष्ट पदार्पणाचा फिल्मफेअर पुरस्कार मिळाला होता. त्यानंतर त्याने 'लव्ह के लिए कुछ भी करेगा', 'ओम जय जगदीश', 'हे बेबी', 'खुशी', 'ऑल द बेस्ट' यांसारख्या चित्रपटांमध्ये भूमिका साकारल्या. २०१० मध्ये 'दुल्हा मिल गया' या चित्रपटात त्याने शेवटचं काम केलं.