Farmani Naaz: हर हर शंभू (Har Har Shambhu) गाणारी फरमानी नाझ पुन्हा एकदा चर्चेत आली आहे. हर हर शंभू गाण्याला आपलं ओरिजनल गाणं सांगणाऱ्या फरमानी नाझच्या विरोधात कायदेशीर कारवाई करण्याची तयारी सुरु करण्यात आली आहे. त्याचं झालं असं की,हर हर शंभू गाण्याचा मूळ गीतकार जीतू शर्मा फरमानीच्या विरोधात कॉपीराइट अॅक्ट अंतर्गत केस ठोकण्याचा विचार करत आहे. एका न्यूज पोर्टलशी बातचीत करताना त्यानं आपण फरमानीवर नाराज असल्याचं सांगितलं आहे.(Farmani Naaz Violate Copyright Act Copies har har shambhu song writer Jeetu Sharma blame)

जीतू शर्माने फरमानी नाज विरोधात नाराजगी जाहीर केली आहे. जीतू म्हणाला आहे की,''मला तिनं गाणं गायलं यासंदर्भात काहीच म्हणायचं नाही. पण ती प्रत्येक ठिकाणी जाऊन सांगतेय की ते गाणं तिचं स्वतःचं ओरिजन गाणं आहे,जे पूर्णपणे चुकीचं,खोटं आहे. तिनं मला गीतकार म्हणून जर क्रेडिट दिलं असतं तर माझा काहीच विरोध नव्हता. फरमानीनं कॉपीराइटचा नियम तोडला आहे. जर ती माफी मागणार नाही तर मी कायदेशीर कारवाई करणार''.

जीतूने सांगितले आहे की आतापर्यंत त्याच्या हर हर शंभू गाण्याचे ३१० व्हर्जन बनले आहेत. त्यानं आपल्या या गाण्याच्या प्रवासाविषयी सांगितलं आहे की,''या गाण्याच्या रेकॉर्डिंगसाठी माझ्याकडे पैसे नव्हते,तर मी माझी एक गाडी फक्त ६० हजारात विकली होती. ज्याची किंमत खरंतर अधिक यायला हवी होती. पण ती माझी शेवटची संधी होती. जर गाण्याला यश मिळालं नसतं तर मी युट्युबला कायमचा राम राम ठोकला असता. इतक्या संघर्षानंतर हे गाणं तयार झालं,पण आज मनाला खूप दुःख होतं जेव्हा कोणी येऊन सांगतं की हे गाणं फरमानी नाझचं आहे''.