बॉलीवूडचे प्रसिद्ध निर्माता आणि अभिनेत्री जान्हवी कपूरचे(Janhavi Kapoor) वडील बोनी कपूर (Boney Kapoor) सोबत सायबर गुन्हा(Cyber Fraud) घडला आहे. त्यांच्या अकाऊंटमधून तब्बल ४ लाख रुपये चोरी झाले आहेत. याची खबर लागताच बोनी कपूर यांनी मुंबई पोलिसांकडे (Mumbai Police) यासंदर्भात तक्रार केली आहे. सध्या पूर्ण प्रकरणाची चौकशी केली जात आहे. पण अद्याप आरोपीला पकडण्यात पोलिसांना यश आलेले नाही.

माध्यमांना मिळालेल्या बातमीनुसार,बोनी कपूर यांच्या क्रेडिट कार्डमधून पाच वेळा ट्रान्झॅक्शन झालं होतं आणि अकाऊंटमधून तब्बल ३.८२ लाख रुपये गायब झाले होते. पण हे सगळं घडण्याआधी बोनी कपूर यांना ना कुणाचा फोन आला होता,ना कोणाशी त्यांनी क्रेडिट कार्ड संदर्भातील माहिती शेअर केली होती. बोनी कपूर यांना याविषयी तेव्हा माहिती झालं जेव्हा बॅंकेतील अधिकाऱ्यांनी क्रेडिट कार्डचं बील भरण्यासाठी फोन केला. सध्या,बोनी कपूर यांनी बॅंकेशी बातचीत केल्यानंतर अंबोली पोलिस स्टेशनमध्ये इन्फॉर्मेशन टेक्नॉलॉजी अॅक्ट अंतर्गत तक्रार दाखल केली आहे.

या प्रकरणात पोलिसांचं म्हणणं आहे की बोनी कपूर यांच्या क्रेडिट कार्डचा वापर करताना संपूर्ण डेटा काढला गेला आहे. ही देखील माहिती पोलिसांना मिळाली आहे की बोनी कपूर यांच्या अकाऊंटमधून जे पैसे काढले गेले आहेत,ते गुडगावच्या अकाऊंटला ट्रान्स्फर झाले आहेत. जे अकाउंट एका कंपनीचं आहे असं प्रथम चौकशीत समोर आलं आहे. सध्या या पूर्ण प्रकरणाची चौकशी केली जात आहे. आणि पोलिस चोराला लवकरात लवकर पकडण्यासाठी पूर्ण कसोशीनं प्रयत्न करत आहेत.

बोनी कपूर एक प्रसिद्ध निर्माता आहेत. त्यांनी 'मिस्टर इंडिया','नो एन्ट्री','जुदाई','वॉन्टेड' सारख्या सिनेमांची निर्मिती केली आहे. त्यासोबतच ते कॉलीवूड मध्येही सिनेमांची निर्मिती करतात. त्यांचं पहिलं लग्न निर्मात्या मोना शौरीसोबत झालं होतं,त्या लग्नापासून त्यांना अर्जुन कपूर आणि अंशुला कपूर ही दोन मुलं आहेत. त्यांनतर बोनी कपूर यांनी श्रीदेवी सोबत लग्न केलं. आणि त्या लग्नापासून जान्हवी आणि खूशी कपूर या दोन मुली त्यांना आहेत. आता बोनी कपूर आपल्या चारही मुलांसोबत आनंदाचे क्षण शेअर करताना कायम दिसत असतात.