Gautami Patil: गेल्या काही दिवसांपासून गौतमी पाटील हे नाव तिच्या नृत्यामुळे चांगलेच प्रसिद्ध झाले आहे. ग्रामीण भागात तर गौतमी पाटील हे नाव काढल्या शिवाय लोकांचे कार्यक्रम होत नाहीत. एकेकाळी टीकेची शिकार झालेल्या गौतमीच्या डान्सशो साठी सध्या वेटिंग आहे.

आज असे चित्र असले तरी मध्यंतरी गौतमी नृत्य करताना अश्लील हावभाव करते म्हणून तिच्यावर टिका करण्यात आली होती. राज्यभरात बरीच आंदोलनं झाली. त्यानंतर गौतमीने माफी मागत भविष्यात असा प्रकार पुन्हा होणार नसल्याचे तिने स्पष्ट केलं होतं.

आता तीच गौतमी लवकरच चित्रपटातही झळकणार आहे. याच निमित्ताने माध्यमांशी बोलताना गौतमीने मनातल्या बऱ्याच गोष्टी बोलून दाखवल्या.

गौतमी 'घुंगरू' या मराठी सिनेमातून लवकरच मोठ्या पडद्यावर दिसणार आहे. 'घुंगरू' या नावातच चित्रपटाचा आशय आपल्या लक्षात येतो. लावणीवर आधारित या चित्रपट गौतमी प्रमुख भूमिकेत आहे. डान्सबरोबरच अभिनय करावा अशी गौतमीची खूप इच्छा होती, जी या निमित्ताने पूर्ण होणार आहे.

नुकतीच गौतमी माध्यमांसमोर आली. यावेळी तिला तिच्या 'घुंगरू' सिनेमाविषयी पत्रकारांनी विचारले. त्यावेळी कोणताही आडपडदा ठेवता गौतमी अगदी खुलेपणाणे बोलली.

यावेळी गौतमी म्हणाली, ''सिनेमा येतोय याबद्दल मला खूप छान वाटतंय.  सिनेमा आणि अभिनय याच्याशी माझा दूर दूर पर्यंत संबंध नव्हता. पण सिनेमातील सगळ्या कलाकारांनी खूप सांभाळून घेतलं. अभिनय कसा करायचा हे शिकवलं. आता मी कसं काम केलं आहे हे तुम्ही सिनेमा रिलीज झाल्यानंतर पाहालच. माझ्या सहकलाकारांनी मला खूप समजून घेतलं.''

चित्रपटाच्या कथानका विषयी गौतमी म्हणाली, ''चित्रपटातही मी एक डान्सर आहे. कलाकारांवर हा सिनेमा आधारीत आहे. मी भूमिकेविषयी जास्त काही सांगणार नाही.  पण एका वयानंतर कलाकाराच्या आयुष्याचं होतं.. त्यालाही प्रेम होतं.. त्यालाही लग्न करावंसं वाटतं.. .पण त्यांचं पुढे काय होतं, कलाकार कसं आयुष्य जगतात यावर आधारित हा सिनेमा आहे.''