Aamir Khan: एकीकडे वयाच्या ५७ व्या वर्षी शाहरुख खान पठाण च्या माध्यमातून बॉक्स ऑफिसवर धुमाकूळ घालतोय. शाहरुख सोबत सलमान खान सुद्धा फॉर्मात आहे. दोन्ही खान चर्चेत असताना आमिर खान मात्र गायब झालाय. नुकत्याच दिल्लीतील एका कार्यक्रमात आमिर खान पंजाबि गायक, अभिनेता जसबीर जस्सी सोबत दिसला. आमिर खानला अशा अवतारात पाहणं सर्वांसाठी नवीन आहे.

जसबीर जस्सीने आमिर सोबतचे फोटो सोशल मिडीयावर पोस्ट केले आहेत. "मनाने श्रीमंत.. आमिर" अशा शब्दात जस्सीने आमिर खानचं कौतुक केलंय. या फोटोत आमिरची ढाढी आणि केस पिकले आहेत. आमिर बारीक दिसतोय. एकूणच आमिर खानचा असा वेगळाच लूक त्याच्या फॅन्सच्या पचनी पडत नाहीये. आमिर आणि जस्सी यांचा फोटो थोड्याच वेळात व्हायरल झालाय.

आमिर खानचा २०२२ ला रिलीज झालेला लाल सिंग चड्ढा बॉक्स ऑफिसवर दणक्यात आपटला. पुढे काही महिन्यांनी आमिर खान सिनेमातून थोडा ब्रेक घेणार, अशी घोषणा झाली. लाल सिंग चड्ढा फ्लॉप झाल्यावर आमिरचं स्टारडम कमी झालंय का? अशा चर्चा सुरु झाल्यात. अशातच आमिरला अशा अवतारात पाहिल्यानंतर त्याचं वलय कमी झालंय, अशाही चर्चा सुरु झाल्यात.

लाल सिंग चड्ढा कडून आमिरला खूप अपेक्षा होती. आमिरचा हा सिनेमा सुपरहिट होईल अशाही शक्यता वर्तवण्यात आलेल्या. आमिर सुद्धा प्रचंड आशावादी होता. परंतु लाल सिंग चड्ढा दणक्यात आपटला आणि आमिरच्या सुपरहिट कारकिर्दीला थोडा ब्रेक लागला. लाल सिंग चड्ढा नंतर आमिरने कोणत्याही प्रोजेक्टची घोषणा केलेली नाही. काहीच दिवसांपूर्वी आमिर काजोल सोबत 'सलाम वेंकी' सिनेमात दिसून आला.

आमिरचा नवीन सिनेमा कधी येणार याची त्याचे फॅन्स आतुरतेने वाट पाहत आहेत. आमिरचे याआधीचे दोन्ही सिनेमे म्हणजेच लाल सिंग चड्ढा आणि ठग्झ ऑफ हिंदुस्तान फ्लॉप झाले. आता आमिरचा पुढचा सिनेमा बॉक्स ऑफिसवर हिट होणार कि त्याच्या फ्लॉप सिनेमाची हॅट्ट्रिक होणार याची सर्वांना उत्सुकता आहे.