Hansal Mehta Stomach Infection: बॉलीवूडचे प्रसिद्ध दिग्दर्शक हंसल मेहता हे त्यांच्या वेगवेगळ्या क्रिएटिव्ह मालिकांसाठी ओळखले जातात. स्कॅम 1992 नंतर काही दिवसांपूर्वी त्यांची स्कूप नावाची मालिका नेटफ्लिक्स प्रदर्शित झाली. ज्याला प्रेक्षकांनी चांगला प्रतिसाद दिला.

ते त्याच्या वेब सिरिजमुळे चर्चेत असतात. त्याच्या बद्दल एक बातमी समोर आली आहे. हंसल मेहता यांना पोटाचं इन्फेक्शन झालं आहे. याबाबत त्यांनी स्वत: ट्विटर हँडलवरून ही माहिती दिली.

मात्र त्याचं ट्विट खुप चर्चेत आलं त्याचं कारण ठरलं ते महाराष्ट्र सरकार. होय, त्यांनी ट्विटमध्ये महाराष्ट्र सरकारला फटकारलं आहे. त्यांना पोटाचा विकार हा मुंबईतील खराब पाण्यामुळे झाला असल्याचे त्यांनी म्हटले आहे. महाराष्ट्र सरकारवर गंभीर आरोप करत त्यांनी रोष व्यक्त केला. महाराष्ट्र सरकार पिण्याचे शुद्ध पाणी देण्यास सक्षम नसल्याचे त्यांनी ट्विटमध्ये म्हटले आहे.

ते म्हणाले, "आज सकाळी मला पोटात इन्फेक्शन झालं. मी माझ्या फॅमिली डॉक्टरांसोबत बोललो. त्यांनी मला सांगितले की त्यांना दररोज अशी लक्षणे असलेले 10 रुग्ण दिसत आहेत आणि काहींना हॉस्पिटलमध्ये दाखलं केलं जात आहे. आपल्या पिण्याच्या पाण्यात असलेल्या जंतांमुळे हा संसर्ग होत असल्याचं दिसून येत आहे.

पुढे हंसल मेहता लिहितात, 'हे खुपच हास्यास्पद आहे की जे शहर देशातील सर्वात मोठ्या शहरांपैकी एक आहे, आर्थिक राजधानी, राज्याची राजधानी आहे, जिथे दोन उपमुख्यमंत्री आहेत, ते आपल्या नागरिकांना पिण्याचे शुद्ध पाणी देखील देऊ शकत नाहीत. '

'खराब रस्ते, वाहतूक कोंडी, पूर नियंत्रीत करणाऱ्या व्यवस्थेचा अभाव आणि आपल्या पायाभूत सुविधांची ढासळलेली अवस्था यांबद्दल बोलायला नको. ही मुंबई आहे आणि ही अशा लोकांद्वारे चालवली जाते जे आपल्या नागरिकांबद्दल संवेदनशील नाहीत. त्यांना फक्त सत्ता आणि स्वतःची तिजोरी भरण्याची काळजी आहे. राज्यांची अवस्था लाजिरवाणी आहे.'

इतकच नाही तर त्यांनी यात काही राजकिय नेत्यांनाही टॅग केलं आहे. सध्या हंसल मेहता यांच्या ट्विटची सोशल मिडियावर खुपच चर्चा होत आहे. काही लोक त्यांना पाठिंबा देत आहेत. तर काही लोक त्याच्यावर टिकाही करत आहे. त्याच्या या ट्विट नंतर महाराष्ट्र सरकार कडून काही पाऊले उचलली जातात का? याकडे लक्ष लागले आहे.