हरियाणवी डान्सर(Haryanvi dancer) सपना चौधरी(Sapna Choudhary)ला अख्ख्या भारतात कोण ओळखत नसेल असं होणार नाही. अभिनय,नृत्य यात तर तिनं आपला जलवा दाखवलेला आपण सगळ्यांनी चांगलाच पाहिला,अनुभवला असेल. सपना चौधरी सोशल मीडियावर चांगलीच सक्रिय असते. ती नेहमी आपले फोटो सोशल मीडिया(Social Media)वर शेअर करीत असते. अर्थात तिच्या दिलखेचक अदा फोटोत पाहून तिचे चाहते घायाळ होतातच पण आता मात्र तिच्या चाहत्यांच्या चेहऱ्यावर सपनाविषयी काळजी पहायला मिळतेय. सपनानं एक व्हिडीओ सोशल मीडियावर शेअर केला आहे ज्यामुळे तिचे चाहते हैराण झालेयत. या व्हिडीओत सपना इस्पितळात दाखल झालेली दिसत आहे. पण काय घडलं आहे नेमकं तिच्यासोबत?

सपना चौधरीची तब्येत तिच्या कार्यक्रमा दरम्यानं अचानक बिघडली होती. ही गोष्ट अगदी अलिकडचीच आहे. त्यानंतर लगेचच सपनाला इस्पितळात दाखल केलं गेलं. पण या बातमीमुळे सपनाचे चाहते मात्र काळजीत पडले होते. पण आता सपनानं इस्पितळातील एक व्हिडीओ शेअर करत,आपण आता ठीक असल्याचा संदेश चाहत्यांसाठी पाठवला आहे. तसंच,तिनं चाहत्यांनी तिच्यासाठी केलेल्या प्रार्थनेबद्दलही आभार मानले आहेत.

या व्हिडीओत आपण पाहू शकाल की,सपना इस्पितळात रुग्ण घालतात तो ड्रेस घालून कोणाच्या तरी आधारानं चालत आहे. आजारामुळे कमजोर झालेल्या सपनाला आधार घेत चालायची वेळ आली आहे म्हणून तिच्या चाहत्यांनी प्रतिक्रियांच्या माध्यमातून हळहळ व्यक्त केली आहे. सपनाच्या या व्हिडीओला काही तासातच हजारो व्ह्यूज मिळाले आहेत.