बऱ्याच प्रतीक्षेनंतर बिग बॉस मराठीचं तिसरं पर्व Bigg Boss Marathi 3 प्रेक्षकांच्या भेटीस आलं. एकूण १५ स्पर्धक बिग बॉसच्या घरात एकत्र राहायला आले आणि अगदी पहिल्या दिवसापासून काही स्पर्धकांनी भांडणाला सुरुवात केली. बिग बॉस हा सर्वांत लोकप्रिय आणि तितकाच वादग्रस्त रिअॅलिटी शो आहे. पहिल्या दिवसापासून या शोची सोशल मीडियावरही चर्चा सुरू झाली. काही स्पर्धकांबद्दल भन्नाट मीम्ससुद्धा Bigg Boss Marathi Memes व्हायरल होऊ लागले आहेत. काही स्पर्धक त्यांच्या फॅशनमुळे तर काही त्यांच्या डायलॉगमुळे सोशल मीडियावर चर्चेत आले आहेत.

सोशल मीडियावरील मीम्समध्ये सर्वाधिक चर्चा अभिनेत्री मीरा जगन्नाथची होऊ लागली आहे. मीरा तिच्या अनोख्या फॅशनमुळे आणि इतर स्पर्धकांसोबत वादामुळे चर्चेत आली आहे. 'येऊ कशी तशी मी नांदायला' या मालिकेत मीराने मोमोची भूमिका साकारली होती. यानंतर ती 'सर्वांत आकर्षक महिला' या यादीतही स्थान पटकावलं होतं. पहिल्याच दिवशी मीराचं जय दुधाणे आणि स्नेहा वाघ यांच्याशी भांडण झालं. यावरूनही भन्नाट मीम्स व्हायरल झाले आहेत.

वेगवेगळ्या स्वभावाची माणसं एकाच घरात तब्बल ९० दिवस राहण्यासाठी आली आहेत. यापैकी काहींची एकमेकांसोबत गट्टी जमते तर काही एकमेकांचे कट्टर वैरी होतात. ९० दिवस कार्यक्रमात टिकून राहण्याचं आव्हान सहभागी होणाऱ्या प्रत्येक कलाकारासमोर असतं. त्यातही बिग बॉसची आज्ञा पाळत त्यांनी दिलेले टास्क इमाने इतबारे पूर्ण करत स्वत:ला सिद्ध करून दाखवायची चुरस या सगळ्याच सदस्यांमध्ये असते.