Nana Patole on Nana Patekar: नाना पाटेकर कायम त्यांच्या विविध वक्तव्यामुळे चर्चेत असतात. नानांच्या रोखठोक स्वभावामुळे कधी त्यांना टीका सहन करावी लागते. तर कधी त्यांचं कौतुकही होतं.

अशातच नाना पाटेकर यांनी एका मुलाखतीत केलेल्या वक्तव्यामुळे अनेकजण टीका करत आहेत. कॉंग्रेसचे प्रदेशाध्यक्ष नाना पटोले यांनी नाना पाटेकरांवर टिका केलीय.

नानांची नानांवर टीका

नाना पाटेकर यांनी २०२४ ला नरेंद्र मोदीच पंतप्रधान होतील असं वक्तव्य केलं होतं. या वक्तव्यावर सध्या बरीच उलटसुलट चर्चा होतेय.

अशातच कॉंग्रेस प्रदेशाध्यक्ष नाना पाटेकरांवर टीका करताना म्हटलंय की, "नानांचे अनेक पिक्चर फ्लॉप झाले आहेत... त्यांना फार काही गांभीर्याने घेऊ नका."

काय म्हणाले होते नाना पाटेकर?

झी बिझनेसला दिलेल्या एका मुलाखतीमध्ये नानांना आगामी काळातील निवडणूकांविषयी विचारण्यात आले. नाना तुम्हाला काय वाटतं कोणता पक्ष पुन्हा सत्तेवर असेल, कोण जिंकेल, या प्रश्नावर नानांनी दिलेलं उत्तर चर्चेत आलं आहे. (What Nana said about election and PM Modi?)

नाना म्हणाले, "मला वाटतं बीजेपी पुन्हा एक मोठा विजय संपादन करेल. २०२४ च्या निवडणूकीमध्ये त्यांची सरशी होईल."

बीजेपीला किती जागा मिळतील यावर नाना म्हणाले, "३७५ ते ४०० जागा बीजेपीला मिळतील. एक कारण म्हणजे आपल्याकडे बीजेपीशिवाय दुसरा कोणताही पर्याय नाही. दुसरी गोष्ट म्हणजे पंतप्रधानपदी नरेंद्र मोदीच दिसतील." असेही नानांनी यावेळी सांगितले.

नाना खडकवासल्यातून निवडणुक लढवणार?

नाना पाटेकर खडकवासल्यातून निवडणूक लढवणार अशी चर्चा सुरु आहे. कारण यापूर्वी गणपती दर्शनाला गेलेल्या अजित पवारांकडेही नाना पाटेकर यांनी खडकवासल्यातून लढण्याची इच्छा व्यक्त केली होती.

त्यामुळे सूत्रांकडून राष्ट्रवादी कॉंग्रेसच्या अजित पवार गटाकडून नाना निवडणूक लढवतील, असा अंदाज वर्तवण्यात येतोय. याबाबत नानांनी अधिकृत वक्तव्य केलं नसलं तरीही याची बरीच चर्चा आहे.