Indian 2 First Look: केवळ साउथच नव्हे तर बॉलीवूड इंडस्ट्रीमध्येही आपल्या दमदार अभिनयाने सर्वांची मने जिंकणारे सुपरस्टार कमल हसन हे नेहमी चर्चेत असतात.

मग ते त्यांच्या चित्रपटामुळे असो किंवा त्यांच्या वक्तव्यामुळे. आता कमल हसन यांच्या चाहत्यांसाठी एक आनंदाची बातमी समोर आली आहे.

तब्बल 27 वर्षांनंतर कमल हसन यांच्या 'इंडियन' या चित्रपटाचा सिक्वेल प्रेक्षकांच्या भेटीला येणार आहे. या चित्रपटात कमल हसन मुख्य भूमिकेत दिसणार आहे.

गेल्या काही दिवसांपासून प्रसिद्ध तमिळ चित्रपट दिग्दर्शक एस शंकर त्यांच्या 'इंडियन 2' चित्रपटामुळे चर्चेत होतेच. चाहतेही या चित्रपटाची बऱ्याच दिवसांपासून प्रतिक्षा करत होते.

आता या चित्रपटाबाबत निर्मात्यांनी मोठी घोषणा केल्यानंतर चाहते खुपच खुश आहेत. निर्मात्यांनी चित्रपटाचे नवीन पोस्टर शेअर करत चाहत्यांना नवीन अपडेट दिली आहे.

'इंडियन 2' ची पहिली झलक 3 नोव्हेंबर 2023 रोजी दाखवली जाईल. मात्र या दिवशी चित्रपटाचा टीझर असेल की ट्रेलर हे सांगण्यात आलेले नाही. लायका प्रॉडक्शनने या संदर्भात अधिकृत घोषणा केली आहे.

या पोस्टमध्ये त्यांनी लिहिले की, "सेलिब्रेशन लवकर सुरू झाले आहे. 3 नोव्हेंबर रोजी रिलीज होणाऱ्या "इंडियन-2 एन इंट्रो" साठी सज्ज व्हा #Indian2 ची एक झलक."

1996 मध्ये आलेला 'इंडियन' हा कमल हासन यांच्या कारकिर्दीतील सर्वोत्कृष्ट चित्रपटांपैकी एक आहे ज्यात मनीषा कोईराला आणि उर्मिला मातोंडकर यांनी देखील महत्वाच्या भूमिका साकारल्या होत्या. 'इंडियन' हा बॉक्स ऑफिसवरही हिट ठरला होता.

उदयनिधी स्टॅलिन आणि ए सुबास्करन यांनी 'इंडियन 2'ची निर्मिती केली आहे. या चित्रपटात रकुल प्रीत सिंग, काजल अग्रवाल, सिद्धार्थ, प्रिया भवानी शंकर यांच्यासह बरेच स्टार्स मुख्य भूमिकेत आहेत.

अनिरुद्ध रविचंदरने आपल्या संगीताने हा चित्रपट सुसज्ज होणार आहे. चित्रपटाच्या प्रदर्शनाची तारीख अद्याप जाहीर झाली नसली तरी तब्बल 27 वर्षांनंतर 'इंडियन 2' बॉक्स ऑफिसवर गदर करेल यात काही शंका नसल्याचे दिसतेय.