Indian Idol : भारतातील एक बहुचर्चित आणि बहूप्रतीक्षित सांगीतिक शो म्हणजे 'इंडियन आयडॉल'. सोनी एन्टरटेन्मेंट टेलिव्हिजनवरील हा शो प्रेक्षकांनी आजवर अक्षरशः डोक्यावर घेतला आहे. या कार्यक्रमाचे 12 वे पर्व अजूनही प्रेक्षक विसरलेले नाहीत. तितक्यातच एक आनंदाची बातमी चाहत्यांसाठी समोर आली आहे. इंडियन आयडॉलचे 13 वे पर्व लवकरच सुरू होणार असून तऑडिशनच्या तारखाही जाहीर झाल्या आहेत.

(Indian Idol Season 13 Registration, Audition, Judges, TV Premiere & More Updates)

इंडियन आयडॉल (Indian Idol) हा भारतीय टेलिव्हिजनवरील एक अत्यंत मानाचा समजला जाणारा रियालिटी शो आहे. 2004 मध्ये सुरू झालेल्या या कार्यक्रमानं गायकीतले अनेक हीरे आपल्याला दिले आहेत. नुतक्याच झालेल्या 12 व्या पर्वातील पवनदीप राजन हा तर अजूनही प्रेक्षकांच्या मनात घर करून आहे. आता 13 व्या पर्वाचे ऑडिशन सुरू झाले असून 24 जुलै रोजी मुंबईत होणार आहे. नाहर इंटरनॅशनल स्कूल, नाहर्स अमृत शक्ती कॉम्प्लेक्स, चांदिवली फार्म रोड, ऑफ साकी विहार रोड, अंधेरी (पूर्व), मुंबई – 400072 येथे सकाळी 10.30 वाजल्यापासून ऑडिशन सुरू होतील.

जयपूर, भुवनेश्वर, गुवाहाटी, पटणा, कोलकाता, इंदूर आणि लखनौनंतर या वाहिनीने देशातील आणखी काही शहरांमध्ये ऑडिशन्स घेण्याचे योजले आहे. चंदिगड, देहरादून आणि दिल्ली जवळ राहणार्‍या तरुण, उत्साही आणि प्रतिभावान गायकांनासाठी नजीकच्या शहरांमध्ये या ऑडिशन देण्याची संधी आहे. या ऑडिशन्सबद्दल बोलताना इंडियन आयडॉल 12 चा विजेता पवनदीप राजन म्हणाला, 'मला पहिल्यापासून गायक व्हायचे होते आणि मी अगदी 2 वर्षांचा असल्यापासून तबला वाजवत होतो. इंडियन आयडॉलने माझे स्वप्न साकार केले. या शोमध्ये असताना मी खूप काही शिकलो.'

पुढे तो म्हणाला मला, 'ऑडिशन दरम्यान माझ्या आधी सवाई भट्टने ऑडिशन दिली होती. असे दर्जेदार गायक असताना मी इथवर पोहोचू शकेन असं मला वाटलंच नव्हतं. ऑडिशन फेरीपासून ते विजेता होईपर्यंत इंडियन आयडॉल या मंचाने मला नेहमीच सुखद धक्के दिले. आज मी जे काही आहे ते या मंचामुळे आहे. तुम्हीही ऑडिशन नक्की डया कारण यंदाचे दावेदार तुम्हीही असू शकता!'