अभिनेता विकी कौशल (Vicky Kaushal) नुकताच कॅटरीनासोबत (Katrina Kaif) विवाहबंधनात अडकला. यानतंर आता तो इंदौरमध्ये (Indore) त्याच्या एका चित्रपटाच्या शूटिंगच्या निमित्ताने फिरताना दिसला. दरम्यान, इंदौरमध्ये सारा अली खानसोबत (Sara Ali Khan) दुचाकीवरून फिरल्यानंतर आता त्याच्याविरोधात पोलिसात तक्रार दाखल करण्यात आली आहे. इंदौरमध्ये राहणाऱ्या एका व्यक्तीने विकी कौशल विरोधात तक्रार केली आहे.

याबाबत मिळालेली माहिती अशी की, इंदौरमध्ये सारा अली खान आणि विकी कौशल ज्या बाईकवरून फिरले त्याचा नंबर आणि आपल्या स्कूटीचा नंबर एकच असल्याचं तक्रार दाखल करणाऱ्याने म्हटलं आहे. चित्रपटाच्या सीनमध्ये जो बाईकचा नंबर दाखवण्यात आला आहे तो आपला असल्याचं तक्रार दाखल करणाऱ्या जय सिंह यादव यांनी म्हटलं आहे. तसंच आपल्या परवानगीशिवाय नंबरचा वापर करता येणार नाही असंही तक्रारीत म्हटलं आहे.

तक्रार करणाऱ्या यादव यांनी म्हटलं की, चित्रपटाच्या सीनमध्ये दिसत असलेल्या बाईकचा नंबर माझा आहे. मला नाही माहिती चित्रपट बनवणाऱ्यांना याची माहिती आहे की नाही. माझ्या नंबरचा माझ्या परवानगीशिवाय वापर करता येणार नाही. हे बेकायदेशीर आहे असून मी पोलिसात लेखी तक्रार दिली असल्याचंही त्यांनी म्हटलं. तसंच या प्रकरणी कारवाई करण्यात यावी अशी मागणीही यादव यांनी केलीय. त्यांनी तक्रारीसोबत आपल्या दुचाकीच्या नंबर प्लेटचा फोटोही शेअर केला आहे.