बॉलिवूडमध्ये सध्या सर्वाधिक चर्चेत असलेली जोडी म्हणजे अभिनेता विकी कौशल (Vicky Kaushal) आणि अभिनेत्री कतरिना कैफ. या नवविवाहित जोडीच्या प्रेमकहाणीविषयी चाहत्यांना उत्सुकता असतानाच आता विकीचा भाऊ सनी कौशलच्या (Sunny Kaushal) अफेअरच्याही चर्चा रंगल्या आहेत. सनीचं नाव बॉलिवूडमध्ये आपला ठसा उमटवणारी मराठमोळी अभिनेत्री शर्वरी वाघ (Sharvari Wagh) हिच्याशी जोडलं जात आहे. शर्वरी ही महाराष्ट्राचे माजी मुख्यमंत्री मनोहर जोशी यांची नात आहे. शर्वरी आणि सनी कौशल यांनी 'द फरगॉटन आर्मी' या वेब सीरिजमध्ये एकत्र काम केलं होतं. तेव्हापासून या दोघांच्या डेटिंगच्या चर्चा होत आहे. इतकंच नव्हे तर विकी-कतरिनाच्या लग्नाला हजेरी लावणाऱ्या काही मोजक्या खास पाहुण्यांमध्ये शर्वरीचाही समावेश होता. या चर्चांवर शर्वरीने नुकतंच मौन सोडलं आहे.

'इंडिया डॉटकॉम'ला दिलेल्या मुलाखतीत शर्वरी म्हणाली, "मी आणि सनीने 'द फरगॉटन आर्मी'मध्ये एकत्र काम केलंय. चार वर्षांपूर्वी आमच्यात खूप चांगली मैत्री झाली. सीरिजचं शूटिंग संपल्यानंतरही आम्ही मित्र म्हणून एकमेकांच्या संपर्कात होतो. त्यामुळे मैत्रीपलीकडे आमच्यात काही नाही. माझ्या आणि सनीविषयी होणाऱ्या चर्चा या केवळ अफवा आहेत. जेव्हा तुम्ही एकमेकांचे चांगले मित्र असता, तेव्हा ती मैत्री तुम्ही लपवू शकत नाही. आमच्या अफेअरविषयी जरी चर्चा होत असल्या तरी आमच्या मैत्रीवर त्याचा काही परिणाम होणार नाही. आपण जगणं तर सोडू शकत नाही ना? इंडस्ट्रीमध्ये असे काही माझे मित्र आहेत, ज्यांच्यासाठी मी नेहमीच उभी असेन."

कतरिना कैफच्या मेहंदीच्या कार्यक्रमातील फोटोंमध्ये शर्वरीला पाहिलं गेलं. गेल्या महिन्यात तिने 'बंटी और बबली २' या चित्रपटातून बॉलिवूडमध्ये पदार्पण केलं. यामध्ये तिने 'गली बॉय' फेम अभिनेता सिद्धांत चतुर्वेदीसोबत भूमिका साकारली होती. यामध्ये सैफ अली खान आणि राणी मुखर्जी यांच्याही मुख्य भूमिका होत्या. मात्र बॉक्स ऑफिसवर चित्रपटाला फारसा प्रतिसाद मिळाला नाही. तर 'शिद्दत' या चित्रपटातील सनी कौशलच्या अभिनयाचं फार कौतुक झालं.