नुकत्याच प्रदर्शित झालेल्या 'जय भीम' या चित्रपटातील एका दृश्यामुळे एक नवा वाद उभा राहिला आहे. या चित्रपटातील एक पात्र दुसऱ्या पात्राला हिंदीत बोलल्याबद्दल कानशिलात लगावताना दिसतंय. कानशिलात लगावणारं हे पात्र प्रसिद्ध अभिनेता प्रकाश राज यांनी साकारलंय. चित्रपटातील या दृष्यामुळे एक नवा वाद सुरू झाला आहे. त्यामुळे प्रकाश राज वादात सापडल्याचं दिसतंय. हे दृश्य हिंदी भाषिक लोकांच्या विरोधात असल्याच्या भावना अनेकांनी व्यक्त केल्या. त्यातच आता प्रकाश राज यांनी आपली बाजू मांडली आहे.

प्रकाश राज यांनी चित्रपटातील त्या दृष्यावरून सूरू असलेल्या वादावर प्रतिक्रिया दिली आहे. यावेळी त्यांनी सांगितले की, "ज्या लोक 'जय भीम'मधील दृश्यावरून टीका करताय, त्यांनी स्वत: आपला अजेंडा उघड केला." एका स्थानिक वृत्तवाहिनीशी बोलताना प्रकाश राज म्हणाले की, "जय भीम सारखा चित्रपट पाहिल्यानंतर त्यांना आदिवासींच्या व्यथा दिसल्या नाहीत, त्यांना अन्यायाची भीती दिसली नाही. त्यांना फक्त ती एक थप्पड दिसली. एवढंच त्यांना समजलं. त्यामुळे त्यांचा अजेंडा स्पष्ट होतो."

ज्या दृष्यावरून हा वाद उभा राहिला, त्यावर बोलताना ते पुढे म्हणाले, "उदाहरणार्थ, दक्षिण भारतीयांना त्यांच्यावर हिंदी लादल्यागेल्याबद्दल राग आहे. जेव्हा एखादा स्थानिक भाषा माहित असणारा व्यक्ती पोलीस अधिकाऱ्याच्या प्रश्नांना उत्तर देण्यासाठी मुद्दाम हिंदी भाषा निवडत असेल, तर त्याच्या प्रतिक्रिया काय असतील? हा चित्रपट १९९० च्या दशकातील घटनेवर आधारित आहे. जर त्या पात्राने त्यांच्यावर हिंदी लादली असती, तर त्यानेही अशीच प्रतिक्रिया दिली असती. कदाचित ते अधिक तीव्रतेने समोर आले असते. हे लोक फक्त प्रकाश राज आहे म्हणून चिडले आहेत. अशा धर्मांधांच्या टीकेवर प्रतिक्रीया देण्यात अर्थ नाही." असे इंडिया टुडेच्या वृत्तामधून समोर आले आहे.

दरम्यान, दिग्दर्शक था से ज्ञानवेलचा जय भीम हा चित्रपट ९० च्या दशकात घडलेल्या एका सत्य घटनेवर आधारित आहे. या चित्रपटात इरुलर जमातीच्या लोकांवर पोलिसांकडून होणारा अत्याचार आणि जातीवरून होणारा भेदभाव यावर भाष्य करण्यात आले आहे. या चित्रपटाला प्रेक्षकांचा चांगला प्रतिसाद मिळताना दिसतोय.