छोट्या पडद्यावर कन्नड(Kannad) मालिकेत काम करून आपल्या अभिनयानं घराघरात प्रसिद्ध झालेली अभिनेत्री चेतना राजचं(Chethana Raj) निधन झालं आहे. अवघ्या २१ व्या वर्षी अभिनेत्रीनं जगाचा निरोप घेतल्यानं केवळ अभिनय क्षेत्रात नाही तर सर्वसामान्य चाहत्यांमध्येही हळहळ व्यक्त केली जात आहे. मीडियाला मिळालेल्या वृत्तानुसार,बंगळुरुमधील एका खाजगी रुग्णालयात(Hospital) चेतना राजचं निधन झाल्याचं कळत आहे. सर्वात अधिक धक्का तिच्या मृत्यूचं कारण समजल्यानंतर प्रत्येकाला लागला आहे. बोललं जात आहे की, रुग्णालयात प्लास्टिक सर्जरी केल्यानंतर तिचं निधन झालं आहे.

१६ मे रोजी सकाळी चेतनाला रुग्णालयात दाखल करण्यात आले होते. तिच्यावर 'फॅट फ्री' शस्त्रक्रिया करण्यात आली पण त्यानंतर तिच्या शरीरात बदल जाणवू लागले. फुफ्फुसात पाणी शिरल्यामुळे काल संध्याकाळी तिची तब्येत आणखीनच खालावली. तिला श्वसनाचा त्रास देखील होवू लागला.

चेतनाचा मृतदेह अद्याप बंगळुरुमधील रुग्णालयात आहे. शवविच्छेदनासाठी तो रमय्या रुग्णालयात नेण्यात येणार असल्याचं कळत आहे. चेतना राजच्या अचानक झालेल्या मृत्यू प्रकरणी जवळच्याच पोलिस ठाण्यात रुग्णालय समितीच्या विरोधात तक्रार दाखल करण्यात आली आहे. त्यासंदर्भात अधिक माहिती लवकरच देण्यात येईल असं बोललं जात आहे.

चेतना राजचे कुटुंबिय बेंगुळुरुमधील अबेगेरे इथं राहत होते. चेतनानं आतापर्यंत अनेक सिनेमा आणि मालिकांमध्ये काम केलं होतं. 'गीता आणि दोरेसानी' अशा मालिकांमध्ये अभिनेत्री चेतना राजनं काम केलं होतं. तिनं 'हवाईयन' सिनेमातही महत्त्वाची भूमिका साकारली होती. आज मनोरंजन सृष्टीत अशा अनेक अभिनेत्री आहेत ज्या सुंदर दिसण्यासाठी किंवा फिगर चांगली दिसण्यासाठी वेगवेगळ्या सर्जरी करीत असतात. प्रियंका चोप्रा,शिल्पा शेट्टी,अनु्ष्का शर्मा,जान्हवी कपूर,श्रृती हसन,आयेशा टाकिया या अभिनेत्रींनी देखील प्लॅस्टिक सर्जरी केली आहे. अर्थात या सर्जरीनंतर काहीजणींना ट्रोलिंगला देखील सामोरं जावं लागलं होतं. पण चेतना राजचा मृत्यूच झाल्या कारणानं ही सर्जरी आता चिंतेची बाब बनू लागली आहे.