बॉलीवूडचा दिग्गज निर्माता-दिग्दर्शक करण जोहर(Karan Johar) हा सोशल मीडियावर नेहमीच सक्रिय पहायला मिळतो. तो त्याच्या वैयक्तिक आणि व्यावसायिक आयुष्यातील अनेक गोष्टी तिथे शेअर करीत असतो. सोशल मीडियाशी त्याचं एक वेगळंच नातं आहे. पण आता यात दुरावा येण्याची शक्यता आहे किंवा असं म्हणूया की तो दुरावा आला आहे. कारण एरव्ही करण जवळ-जवळ रोजच त्याच्या डे टू डे लाइफचा वृत्तांत मजेदार पद्धतीनं त्याच्या सोशल मीडिया अकाऊंटवर शेअर करताना दिसायचा. पण आता ते सगळं कमी झालं आहे. करणनं ठरवलं आहे आता तो सोशल मीडियावर फक्त त्याच्या कामाशी संबंधित महत्त्वाच्या गोष्टीच सोशल मीडियावर शेअर करणार आहे.

करणला याविषयी जेव्हा एका मुलाखतीत विचारलं गेलं तेव्हा करणनं सांगितलं की आता तो केवळ त्याच्या सिनेमासंबंधित पोस्ट सोशल मीडियावर शेअर करणार आहे. माझ्यासाठी सोशल मीडिया हे माध्यम आता केवळ माझ्या कामाला जगापर्यंत पोहोचवण्याचं एक माध्यम असेल. आणि जे मी फक्त माझं एक काम समजून करेन. पुढे त्याविषयी अधिक स्पष्टिकरण देताना करण म्हणाला,''मी आता जेव्हा माझा सिनेमा पूर्ण होईल तेव्हा तो कधी प्रदर्शित होणार किंवा तो येत आहे याविषयी फक्त लोकांना मेसेज देण्यासाठी माझ्या पोस्ट सोशल मीडियावर शेअर करेन. यापुढे उगाचच माझ्या वैयक्तिक आयुष्यात काय सुरु आहे मग ते आनंद किंवा दुःख यापैकी कशावरही मी सोशल मीडियावर व्यक्त होणार नाही''.

करणनं त्या मुलाखतीत ट्रोलिंगला घेऊनही मोठं भाष्य केलं आहे. तो म्हणतो,''आता मी ट्रोलिंगचा फार विचार करत नाही,पण आधी मला या सगळयाचा खूप त्रास व्हायचा. मी आता फक्त अशाचं कमेंट वाचतो जिथे कमेंटबॉक्स मध्ये मला हार्ट इमोजी दिसेल. माझ्या सेक्शुअॅलिटीविषयी गलिच्छ भाषेत केलेली कमेंट किंवा त्यांना जे काही माझ्या विषयी वाटतं याचा विचार करण्यापेक्षा मी आता विचार करतोय की मे २०२२ मध्ये मी ५० वर्षांचा होईन आणि माझ्यासाठी ही खूप आनंदाची गोष्ट आहे''.

ट्रोलर्सना कळवळीची विनंती करत करण म्हणाला,'' माझं आयुष्य खूप साधं आहे. माझ्यावर प्रेम करा किंवा राग करा,पण मला उगाचच मी कुणीतरी वेगळा परग्रहावरचा माणूस आहे म्हणून कुत्सित नजरेनं माझ्याकडे पाहू नका,कारण ती वेगळी वागणूक मला मारुन टाकेल. मी ती वेगळी वागणूक सहन करू शकत नाही''.