अभिनेता विकी कौशल Vicky Kaushal आणि कतरिना कैफ Katrina Kaif यांनी सोशल मीडियावर लग्नसोहळ्याचे फोटो पोस्ट केल्यानंतर अवघ्या काही मिनिटांतच ते व्हायरल झाले. या फोटोंमधील प्रत्येक बारिकसारिक गोष्ट नेटकऱ्यांनी निरखून पाहिली असून एका फोटोमधील कतरिनाच्या अंगठीची सोशल मीडियावर चर्चा होत आहे. साखरपुड्याच्या अंगठीसाठी कतरिना-विकीने नीलम या रत्नाची निवड केल्याचं पहायला मिळत आहे. टिफनी या ब्रँडकडून त्यांनी सफायरची sapphire अंगठी घेतली आहे. नेहमीच्या सॉलिटेअर एंगेजमेंट रिंगची निवड न करता कतरिनाने प्रिन्सेस डायनासारख्या नीलम अंगठीला पसंती दिली आहे. प्रिन्सेस डायनाच्या निधनानंतर, ही शाही अंगठी त्यांची सून केट मिडलटनला देण्यात आली होती. 'टाइम्स ऑफ इंडिया'ने दिलेल्या वृत्तानुसार, या अंगठीची किंमत ही ७.४१ लाख रुपये आहे. (Katrina Kaif Engagement Ring)

लग्नसोहळ्यासाठी इतर बॉलिवूड सेलिब्रिटींप्रमाणेच विकी आणि कतरिनानेही फॅशन डिझायनर सब्यसाचीच्या कपड्यांनाच पसंती दिली. कतरिनाने लाल लेहंगा तर विकीने आयवरी सिल्क शेरवानी परिधान केली होती.

राजस्थानच्या सवाई माधोपूर इथल्या सिक्स सेन्सेस फोर्ट बरवारामध्ये विकी-कतरिनाचा शाही विवाहसोहळा पार पडला. 'आम्हाला या क्षणापर्यंत आणलेल्या प्रत्येक गोष्टीबद्दल आमच्या अंतःकरणात फक्त प्रेम आणि कृतज्ञता आहे. आम्ही एकत्र या नवीन प्रवासाची सुरुवात करत असताना तुमचं प्रेम आणि आशीर्वाद राहू दे,' असं लिहित विकी-कतरिनाने सोशल मीडियावर लग्नाचे फोटो पोस्ट केले. प्रियांका चोप्रा, करिना कपूर खान, आलिया भट्ट, हृतिक रोशन, वरुण धवन, दीपिका पदुकोण, रणवीर सिंग यांसारख्या सेलिब्रिटींनी विकी-कतरिनावर शुभेच्छांचा वर्षाव केला.