मराठमोळ्या ओम राऊत यांनी दिग्दर्शित केलेला आदिपुरुष हा चित्रपट अखेर प्रेक्षकांच्या भेटीला आला आहे. प्रभास, क्रिती सेनॉन आणि सैफ अली खान यांच्या मुख्य भुमिका असलेला हा चित्रपट काही दिवसांपासून चर्चेत आहे. हा चित्रपट रिलीज झाल्यानंतर यातील संवादांमुळे या चित्रपटावर सोशल मीडियातून प्रचंड टीका केली जात आहे. यादरम्या मराठी अभिनेत्री केतकी चितळेने चित्रपटाबद्दल प्रतिक्रिया दिली आहे.

केतकी तिच्या सोशल मीडिया पोस्टमुळे नेहमीच चर्चेत असते. केतकीने आदिपुरूष चित्रपटाबद्दल पोस्ट लिहीली असून यामध्ये तिने रावणाचा श्री रावण असा उल्लेख केला आहे. तसेच मी चित्रपट बघितलेला नाही त्यामुळे मी त्यावर बोलू शकत नाही. पण ज्या चित्रपटाच्या टिझर मध्ये शिवभक्त रावण रुद्राक्ष तोडणार असेल तर मी तो चित्रपट बघणारही नाही, असं म्हटलं आहे.

आदिपुरुष चित्रपटावर केतकीची पोस्ट

फेसबुकवर लिहिलेल्या पोस्टमध्ये केतकी चितळेने लिहीलं की, "बऱ्याच लोकांनी मला विचारले की माझे आदिपुरुष या सिनेमा विषयी काय मत आहे. माझे मत: मी बघितलेला नाही त्यामुळे मी त्यावर बोलू शकत नाही. पण ज्या चित्रपटाच्या टिझर मध्ये शिवभक्त रावण रुद्राक्ष तोडणार असेल तर मी तो चित्रपट बघणारही नाही."

"रावण एक शिवभक्त ब्राह्मण होते ज्यांनी सौराष्ट्रातील सोमनाथ मंदीर बांधले होते. सोमनाथ मंदीर अनेक वेळा पडले आहे आणि बऱ्याच राजांनी आणि एका राणीने ते पुन्हा बांधले आहे. त्यापैकी एक श्री रावणही आहेत. रामायण हा घडलेला इतिहास आहे, फिरंगांनी ठरवलेले मिथ्य नाही. पुरावे आहेत रामायणाचे. नवी पिढी मूर्ख नाही की जे त्यांच्या नावावर बिल फाडून सारवासारव करणे चालू शकेल." दरम्यान केतकीच्या या पोस्टमुळे नव्या वादाला तोंड फुटलं आहे.

दरम्यान आदिपुरूष चित्रपटातील काही डायलॉगसाठी वापरण्यात आलेल्या भाषेवरून जोरदार टीका होत आहे. चित्रपटातील वाईट व्हिएफएक्स आणि संवादावर आक्षेप घेण्यात आले आहेत. चित्रपटाचे संवाद लेखक मनोज मुंतशीर शुक्ला यांच्यावर हनुमान यांच्या संवादावरुन टिकेची झोड उठवली जात आहे.