२००० मध्ये प्रदर्शित झालेल्या 'मोहब्बतें' या चित्रपटातून बॉलिवूडमध्ये पदार्पण करणारी अभिनेत्री किम शर्माने (Kim Sharma) बॉयफ्रेंड लिएंडर पेससोबत (Leander Paes) ख्रिसमसच्या सेलिब्रेशनची रोमँटिक सुरुवात केली आहे. गुरुवारी किमने लिएंडरसोबतचे काही फोटो सोशल मीडियावर पोस्ट केले. यातील एका फोटोमध्ये ती स्वत: कॅमेऱ्यासमोर आनंदाने पोज देताना दिसत आहे. किमने लिएंडरसोबतचा रोमँटिक फोटोसुद्धा पोस्ट केला आहे, ज्यामध्ये दोघं एकमेकांना किस करताना दिसत आहेत.

जुलै महिन्यात टेनिस स्टार लिएंडरचे किमसोबत गोव्यातील काही फोटो सोशल मीडियावर व्हायरल झाले होते. गोव्यामधील रेस्टॉरंटने हे फोटो शेअर केले होते. तेव्हा हे दोघं डेट करत असल्याचं स्पष्ट झालं होतं. त्याआधीही छायाचित्रकारांनी दोघांना वांद्रयामध्ये एकत्र असताना गाठलं होतं.

लिएंडर पेस आणि किम शर्मा दोघांची यापूर्वी प्रेम प्रकरणं होती. लिएंडर रेहा पिल्लाईसोबत लिव्ह इन रिलेशनशिपमध्ये होता. तिच्यापासून त्याला एक मुलगीसुद्धा आहे. किम याआधी अभिनेता हर्षवर्धन राणेला डेट करत होती. युवराज सिंग बरोबर तिच्या प्रेमसंबंधांचीही बरीच चर्चा झाली होती. किम शर्माने २००० साली शाहरुख खानच्या 'मोहब्बते' चित्रपटातून बॉलिवूडमध्ये पदार्पण केलं. त्यानंतर ती फिदा आणि अन्य काही चित्रपटांमध्ये दिसली. लिएंडर पेस भारताचा प्रसिद्ध टेनिसपटू आहे.