एका काळी जे 'थलाइवा' रजनीकांतसाठी पहायला मिळत होतं,ते आता चाहत्यांनी विजय देवरकोंडासाठी केल्याचं पहायला मिळालं. लोक रजनीकांतचा सिनेमा रिलीज झाल्यावर त्याच्या उंच कट आऊट्सला पुष्पहार घालून दुधाची आंघोळ घालायचे. काहीसं असंच आता तेलुगु अभिनेता विजय देवरकोंडा(Vijay Deverakonda) सोबत घडलेलं पहायला मिळालं. विजय देवरकोंडाचा बहुप्रतिक्षित सिनेमा 'लाइगर'चा ट्रेलर २१ जुलै रोजी लॉंच करण्यात आला. या ट्रेलर लॉंचचे निमित्त साधून चाहत्यांनी विजय देवरकोंडाच्या ७५ फूट उंच कट आऊट्स उभारला ,आणि इथवर न थांबता त्यांनी चक्क त्या कट आऊट्सला दुधाची आंघोळही घातली.(Liger Trailer: South Fans Pour Milk On vijay Deverakonda cut Out Posters Video Goes Viral On Social Media)

गेल्या वर्षी म्हणजे २०२१ मध्ये जेव्हा 'लाइगर' सिनेमाचा पोस्टर रिलीज करण्यात आला होता तेव्हा देखील चाहत्यांनी त्याला दुधाची आंघोळ घातली होती,त्याची आरतीही केली होती. चाहत्यांनी तेव्हा विजय देवरकोंडासाठीच्या आपल्या प्रेमाची हद्दच पार केली होती. आता लाइगरच्या ट्रेलर लॉंचच्या निमित्ताने हैदराबादच्या एका थिएटर बाहेर चाहत्यांनी विजय देवरकोंडाचा ७५ फूट उंच कट आऊट उभारला आहे. या कटआऊट मध्ये विजय देवरकोंडा भारताच्या तिरंग्याला उंचावताना दिसत आहे. अभिनेत्याचा हा कटआऊट लाइगरच्या एका सीनच्या आधारावर बनवला आहे. या सिनेमात विजय देवरकोंडा एमए किक बॉक्सरच्या भूमिकेत आहे.

'लाइगर' सिनेमा २५ ऑगस्ट रोजी प्रदर्शित होत आहे. पुरी जगन्नाथच्या दिग्दर्शनाखाली बनलेल्या या सिनेमातून विजय देवरकोंडा बॉलीवूडमध्ये पदार्पण करत आहे. तर अनन्या पांडे या सिनेमाच्या माध्यमातून तेलुगु सिनेमात पदार्पण करतेय. लाइगर सिनेमात बाहुबली सिनेमातील शिवगामी म्हणजेच राम्या कृष्णन देखील आहे. विजय देवरकोंडाच्या या ७५ फूटी उंच कट आऊट्सला चाहत्यांनी पुष्पहार तर घातलेच पण दुधानं देखील आंघोळ घातली.

दाक्षिणात्य सिने इंडस्ट्रीत अभिनेत्यासाठी चाहत्यांचे प्रेम एका वेगळ्या लेवलवर पहायला मिळते. कधी चाहते आपल्या स्टार्सच्या कट आऊट्सला दुधाची आंघोळ घालतील तर कधी त्यांच्या नावाचं मंदीर किंवा मूर्तीही बनवतील,याचा काहीच नेम नसतो. साऊथच्या चाहत्यांनी अभिनेत्री खुशबू सुंदरचे देखील मंदीर बनवले होते. २०१९ मध्ये अभिनेता सूर्याचा Nandha Gopalan Kumaran या त्याच्या सिनेमाला भरघोस यश मिळाल्यानंतर चाहत्यांनी २१५ फूटी कट आऊट्स बनवला होता. २०१७ मध्ये मद्रास हाय कोर्टाने खरंतर असे उंच कट आऊट्स बनवण्यावर बंदी आणली होती. पण तरी देखील केजीएफ च्या रॉकी भाईचा म्हणजेच अभिनेता यशचा देखील उंच कट आऊट्स उभारला गेला होता.

२०१७ मध्ये महेश बाबूच्या चाहत्यांनी त्याचा ९० फूट उंच कट आऊट्स लावल्यानंतर पोलिसांनी आक्षेप घेतला होता. तेव्हा बोललं जात होतं की त्याच्या एका चाहत्याने पोलिसांच्या आक्षेपानंतर आत्महत्या करण्याचा प्रयत्न केला होता.