CM Eknath Shinde Book Launch of Madhur Bhandarkar: आज मुंबई मॅग्नेट पब्लिशिंग प्रा. लि. आयोजित 'सोसायटी अचीव्हर्स' मासिकाचं प्रकाशन करण्यात आलं. यावेळी मधूर भांडारकर यांंचं मुख्यमंत्र्यांनी अभिनंदन केलं.

सोसायटी अचीव्हर्स हे प्रतिष्ठित मासिक आहे. यंदा या मासिकाच्या कव्हर पेजवर मधूर भांडारकर यांना स्थान मिळालंय. यावेळी मुख्यमंत्र्यांनी मधूर भांडारकरांच्या संघर्षाची दखल घेत त्यांचं अभिनंदन केलंय.

मुख्यमंत्री एकनाथ शिंदेंनी या प्रकाशन सोहळ्यात भावना व्यक्त केल्या. शिंदे म्हणतात, "सोसायटी मॅक्जिनचे आभारी आहे की, ते चांगल्या लोकांना शोधून पुरस्कार देत आहेत. मी पण या कव्हर पेजवर आलो होतो. माझाही संघर्ष आहे. समाजसेवक हा इतर पद्धतीने त्याची सेवा करत असतो. माझीही सुरुवात ही शिवसैनिकापासून झाली. आज मी मुख्यमंत्री आहे. पण माझे पाय जमिनीवर आहे."

पुढे मुख्यमंत्र्यांनी मधूर भांडारकर यांच्या कामाचं कौतुक केलं. याशिवाय लेक लाडकी योजनेचा उल्लेख केला. शिंदे म्हणाले, "लेक लाडकी हा आम्ही घेतलेला निर्णय महिलांसाठी आहे. महिलांच्या हितासाठी आहे. अनेक निर्णय घेतलेत ते सांगितले तर मधुर भंडारकर बाजूला राहतील. भांडारकर साहेब तुमची इंडस्ट्री खूप मोठी आहे. त्यासाठी काही करायचं असल्यास त्यांनी सांगावं. वर्षा हा बंगला आपल्या सर्वाचा आहे. आपल्यासाठी वर्षाचे दरवाजे सदैव उघडे आहेत. अनेकांना वाटतं हे खूप पैसे कमवतात. मात्र त्याचं दुकानं त्यांनाचं माहीत! पण आमच्याकडून काही करायचं असल्यास आम्ही नक्की करु."

मुख्यमंत्री शेवटी म्हणाले, "भांडारकरांनी अनेक चित्रपट काढले. जे समाजाला आरसा दाखवणारे आहेत. भांडारकर हे खूप फिरतात मीही फिरतो. फिरल्याने तेथील ग्राऊंड रिअॅलिटी कळते. आपण गेल्याने पूर्ण टिम अलर्ट होते. कोणतीही फिल्मी बॅकग्राऊंड नसताना मधूर भांडारकर यांनी बॉलिवूड इंडस्ट्रीत स्वतःचं स्थान निर्माण केलं. मराठी कुटुंबातून आलेला युवक हिंदी इंडस्ट्रीत स्वतःचं नाव कमावतो याचा मला आनंद आहे."