'माझ्या नवऱ्याची बायको' या मालिकेत शनायाची भूमिका साकारून घराघरात पोहोचलेली अभिनेत्री रसिका सुनीलने Rasika Sunil प्रियकर आदित्य बिलागीशी Aditya Bilagi लग्न केलं आहे. गोव्याच्या किनाऱ्यावर मोजक्या पाहुण्यांच्या उपस्थितीत हा विवाहसोहळा पार पडला आहे. रसिका आणि आदित्यने या लग्नाचा फोटो नुकताच सोशल मीडियावर पोस्ट केला आहे. या दोघांनी १८ ऑक्टोबर रोजीच लग्न केलं होतं. मात्र फोटो त्यांनी आज (३० ऑक्टोबर) पोस्ट केला आहे. (Rasky weds Adi)

सप्तपदी घेतानाचा फोटो रसिका-आदित्यने पोस्ट केला आहे. '१८ ऑक्टोबर २०२१, बीचवर रस्की-आदिचं लग्न', असं कॅप्शन या फोटोला देण्यात आलं आहे. या फोटोच्या कमेंट्समध्ये चाहत्यांसह मराठी इंडस्ट्रीतील अनेक कलाकारांनी शुभेच्छांचा वर्षावर केला आहे.

दोन वर्षांपूर्वी रसिका 'माझ्या नवऱ्याची बायको' ही मालिका सोडून लॉस एंजिलिसला पुढील शिक्षणासाठी गेली होती. तिथे तिची आदित्यशी ओळख झाली. १ जानेवारी रोजी नवीन वर्षाच्या शुभेच्छा देत असतानाच रसिकाने तिचं रिलेशनशिप जाहीर केलं होतं. ‘सर्वांना नवीन वर्षाच्या शुभेच्छा. २०२० या वर्षभरात अनेक वाईट घडामोडी घडल्या असल्या तरी कृतज्ञ राहण्यासाठी या वर्षाने अनेक कारणं दिली आहेत’, असं कॅप्शन देत तिने आदित्यसोबतचा रोमँटिक फोटो पोस्ट केला होता.