अभिनेत्री मलायका अरोराचा(Malaika Aroa) काही दिवसांपूर्वी एक अपघात झाला होता, यामध्ये अभिनेत्री जखमी झाली होती. यात तिचं रक्तही खूप वाहून गेलं होतं. एक दिवस इस्पितळात राहून नंतर तिला घरी सोडण्यात आलं होतं. पण तेव्हाही ती व्हिलचेअरवर बसून घरी जाताना दिसली. सोशल मीडियावर तिचे या अवस्थेतले फोटोज व्हायरल झाले होते. घरी काही दिवस आराम केल्यानंतर आता मलायका पुन्हा कामावर रुजू झाली आहे. त्यानंतर मीडियाला दिलेल्या एका मुलाखतीत मलायका अरोरानं आपल्या अपघाताविषयी सविस्तर सांगितलंय. ती म्हणाली, ''मी शारिरीक आणि मानसिक रित्या पूर्ण डळमळली आहे. माझ्या शरीरावरच नाही तर त्या अपघातानं मनावरही आघात झालाय. मी अजूनही त्या अपघाताला विसरु शकले नाही''.

मलायका अरोराचा अपघात २ एप्रिल रोजी मुंबईत खोपोलीजवळ झाला होता. अभिनेत्री एका इव्हेंटवरुन घरी परतताना हा अपघात झाला होता. ज्यानंतर तिला इस्पितळात दाखल करण्यात आलं होतं. एक दिवसांत तिला घरी सोडण्यात आलं होतं. एका वर्तमानपत्राला दिलेल्या मुलाखतीत मलायाका म्हणाली,''तो अपघात एक अशी गोष्ट आहे की ज्याविषयीच्या सगळ्या आठवणी मला पुसून टाकायच्या आहेत. पण मी विसरु शकत नाहीय. शारिरीक नाही तर मानसिक रित्याही मी पूर्ण कोसळली आहे. मी जर कोणता सिनेमाही पाहतेय आणि त्यात अपघाताचा सीन आहे आणि रक्तपात दाखवला जात आहे तर मला लगेच त्याची भीती वाटू लागते. आणि मी सध्या अशाच परिस्थितून जात आहे. त्या अपघाताला मी विसरू शकले नाही''

मलायका अरोरा पुढं अपघाताविषयी सांगताना म्हणाली, ''मला काही वेळ कळलंच नाही की मी जिवंत आहे की मेली आहे. मी शॉक मध्ये गेले होते पूर्ण. माझं डोकं खूप दुखत होतं. मला फक्त एवढंच माहित करुन घ्यायचं होतं की मी जिवंत आहे की मेले. खूप रक्त वाहत होतं ते सगळं अचानक घडलेलं पाहून. मला फक्त जोराचा आवाज कानावर आदळला आणि मला धक्का लागला,सगळंच नजरेसमोर धुसर झालं. इस्पितळात जाऊन मला शुद्ध आली''.

गेल्या आठवड्यात मलायका अरोरानं एक फोटो शेअर केला होता,ज्यात ती घरी परतल्यानं खूश दिसत होती. मलायकाला दोन आठवड्यासाठी डॉक्टर्सनी आराम करायला सांगितलं होतं. पण त्यानंतर शूटिंगला परतल्यावर आपल्याला खूप थकवा जाणवत होता असं मलायका म्हणाली. आपल्या शरीरात जीवच नाही अशी जाणीव सारखी होत होती. प्रचंड थकवा जाणवत होता. काही दिवसांपूर्वीच मलायका अरोराला रणवीर-आलियाच्या लग्नाच्या रीसेप्शनला पाहिलं गेलं.