अभिनेता आरोह वेलणकर बाबा झाला असून सोशल मीडियावर पोस्ट लिहित त्याने चाहत्यांना ही आनंदाची बातमी सांगितली. आरोहची पत्नी अंकिता हिने मुलाला जन्म दिला असून आई आणि बाळाची प्रकृती सुखरुप असल्याचं त्याने सांगितलं. 'मुलगा झाला', अशी पोस्ट त्याने शेअर केली असून सोशल मीडियावर त्याच्यावर शुभेच्छांचा वर्षाव होत आहे. अलीकडेच त्याच्या पत्नीचा डोहाळ जेवणाचा कार्यक्रम पार पडला होता. त्याने फोटो आरोहने सोशल मीडियावर पोस्ट केले होते. आरोह आणि अंकिता जवळपास तीन वर्षांपूर्वी लग्नबंधनात अडकले होते. आरोहचं हे लव्ह मॅरेज असून कॉलेजमध्ये त्याची आणि अंकिताची पहिली भेट झाली होती. 

२७ डिसेंबर २०२० रोजी आरोहने पत्नीच्या डोहाळ जेवणाचे फोटो पोस्ट केले होते. 'फक्त दोन महिने शिल्लक राहिलेत', असं त्याने या फोटोंच्या कॅप्शनमध्ये लिहिलं होतं. त्यानंतर आता मुलगा झाल्याची पोस्ट लिहिताच प्रार्थना बेहरे, स्पृहा जोशी, गौरी नलावडे, धनश्री कडगावकर, भूषण प्रधान या सेलिब्रिटींनीही त्याच्यावर शुभेच्छांचा वर्षाव केला. 

आरोहने प्रवीण तरडे लिखित 'रेगे' या चित्रपटातून पदार्पण केलं होतं. चित्रपट आणि नाटकांमध्ये काम केल्यानंतर आरोहने 'बिग बॉस मराठी' या रिअॅलिटी शोमध्ये हजेरी लावली होती. सध्या तो 'लाडाची मी लेक गं' या मालिकेत अभिनेत्री मिताली मयेकरसोबत भूमिका साकारतोय.