Lalit Prabhakar: मराठी सिनेमातील सध्याचा हॅन्डसम अभिनेता म्हटलं की ललित प्रभाकरचं नाव डोळ्यासमोर येतं. मराठी मालिका आणि सिनेमांमधनं आपल्या अभिनयाची चुणूक दाखवत ललितनं आपला मोठा चाहता वर्ग निर्माण केला आहे. ललितच्या आजपर्यंतच्या सिनेमांवर नजर फिरवली तर बहुतांशी सिनेमातून त्यानं रोमॅंटिक हिरोच साकारला आहे आणि त्यात त्याला यशही मिळालं आहे.

पण आता पहिल्यांदाच ललित प्रभाकर अॅक्शन हिरोच्या भूमिकेत आपल्या सर्वांसमोर येणार आहे. आजच त्याच्या नवीन सिनेमाची एक झलक त्यानं सोशल मीडियावर पोस्ट केली अन् त्याचं बदललेलं रुप अनेकांना आवडलं देखील...चला,जाणून घेऊया ललितच्या या नव्या सिनेमाविषयी. (Marathi Actor Lalit Prabhakar New Movie Tarri.)

'टर्री' असं ललितच्या या नवीन सिनेमाचं नाव आहे. सिनेमाचं दिग्दर्शन महेश रावसाहेब काळे करणार आहे. या सिनेमात ललित टोटल दाक्षिणात्य सिनेमातील हिरोसारखा दिसत आहे. त्याचा रावडी लूक जबरदस्त दिसतोय. आणि अशा लूक मध्ये ललित प्रभाकर पहिल्यांदाच दिसत असल्यानं सर्वच स्तरातून कौतूक होतंय. ललितनं सिनेमाची पहिली झलक शेअर करताना पोस्टमध्ये लिहिलं आहे की, ''त्याची नजर टर्री, त्याचा जिगर टर्री..! त्याला नडणाऱ्यांची टर्रर्रर्रकन फाडायला येतोय...टर्री!!!''

ललितच्या या पोस्टवर त्याच्या चाहत्यांनीच नाही तर मराठी इंडस्ट्रीतीलही अनेक दिग्ग्जांनी कौतूकाचा वर्षाव केला आहे.

ललित प्रभाकर काही दिवसांपूर्वीच हेमंत ढोमे दिग्दर्शित 'सनी' या सिनेमातून आपल्या भेटीस आला होता. हा सिनेमा हवा तसा बॉक्सऑफिसवर चालला नसला तरी सनीच्या भूमिकेतील ललित मात्र रसिकांवर आपली छाप सोडून गेला. आता पहायचं की ललित प्रभाकरचा 'टर्री' सिनेमातील लूक प्रक्षेकांना किती भावतो.