शरद पोंक्षेंचं वेबविश्वात पदार्पण; पर्ण पेठेही साकारणार महत्त्वपूर्ण भूमिका
आपल्या दर्जेदार अभिनयाच्या जोरावर मराठी चित्रपटसृष्टीत हक्काचं स्थान निर्माण करणारे अभिनेता म्हणजे शरद पोंक्षे. चित्रपट, नाटक आणि मालिका अशा माध्यमांतून प्रेक्षकांच्या भेटीला आलेल्या शरद पोंक्षे यांनी आतापर्यंत विविधांगी भूमिका साकारल्या आहेत. त्यातच काही काळापूर्वी कर्करोगासारख्या असाध्य आजारावर मात करत पुन्हा एकदा त्यांची पावलं चित्रपटसृष्टीकडे वळली आहेत.  विशेष एक म्हणजे लवकरच ते वेबविश्वात पदार्पण करणार आहेत. 

प्लॅनेट मराठीच्या आगामी वेबसीरिजमध्ये शरद पोंक्षे मुख्य भूमिकेत झळकणार आहेत.   कौटुंबिक कथेवर आधारित असलेली ही सीरिज सहा भागांची आहे. अगदी तुमच्या आमच्या कुटुंबात घडणाऱ्या घटना या सीरिजमध्ये पाहायला मिळणार आहे. सध्या या सारिजचं नाव गुलदस्त्यात असून यात शरद पोंक्षेसोबत अनेक दिग्गज कलाकार मंडळी झळकणार आहेत. 

हेही वाचा : मुंबईतील आठ ऐतिहासिक वास्तू; एकदा तरी नक्की भेट द्या!

 ''आजवर हाताळलेल्या विषयांपेक्षा हा जरा वेगळाच विषय आहे. ही वेबसीरिज प्रेक्षक आपल्या आयुष्याशी कुठेतरी जोडू शकतात. ही सीरिज ज्या विषयावर आधारित आहे, तो विषय खरोखरच गंभीर होता. मात्र तरीही आम्ही या गंभीर विषयाला विनोदाची जोड देत, अतिशय हलक्याफुलक्या पद्धतीने हा विषय मांडला आहे. अभिनयात पूर्ण मुरलेले कलाकार असल्याने या सर्व जणांनी आपापल्या भूमिकेला उत्तम न्याय दिला आहे,'' असं प्लॅनेट मराठीचे अक्षय बर्दापूरकर म्हणाले. 

हेही वाचा : अभिमानास्पद!  कॅनडामध्ये उभारला महात्मा गांधींचा बर्फाचा पुतळा

अशी असेल स्टारकास्ट

शरद पोंक्षे, शिल्पा तुळसकर, तेजस बर्वे, पर्ण पेठे, उदय नेने अशी दमदार स्टारकास्ट असलेली ही वेबसिरीज कौटुंबिक आणि विनोदी स्वरूपाची असणार आहे. 

दरम्यान, या सीरिजची निर्मिती वर्जिनोशन्स करत असून दिग्दर्शन अमित कान्हेरे करत आहेत. तर, प्रतिक व्यास, अमित कान्हेरे यांनी निर्मितीची धुरा सांभाळली आहे.