प्रेक्षकांच्या प्रतिक्षेला विराम देत १९ नोव्हेंबर रोजी संपूर्ण महाराष्ट्रात 'झिम्मा' Jhimma हा चित्रपट प्रदर्शित झाला. या चित्रपटाला बॉक्स ऑफिसवर प्रेक्षकांचा प्रचंड प्रतिसाद मिळत असून त्याचे सर्व शोज हाऊसफुल्ल जात आहेत. वीकेंडला महाराष्ट्रातील चित्रपटगृहांबाहेर हाऊसफुल्लचे बोर्ड लागले होते तर 'झिम्मा'चे प्री बुकिंगही जोरदार झाले. हिंदी चित्रपटांची तगडी टक्कर असतानाही 'झिम्मा' चांगली कमाई करण्यात यशस्वी ठरत आहे. गेल्या दहा दिवसांत या चित्रपटाने ४.७१ कोटी रुपयांचा गल्ला जमवला आहे. तर पहिल्या आठवड्यात या चित्रपटाची कमाई २.९८ कोटी रुपये इतकी झाली. Jhimma Box Office Collection

'झिम्मा'ची दुसऱ्या आठवड्यात १.७३ कोटी रुपयांची कमाई झाली. कमाईचा हा आकडा येत्या दिवसांत आणखी वाढण्याची शक्यता आहे. सोशल मीडियावरही या चित्रपटाची जोरदार चर्चा सुरु आहे.

हेमंत ढोमे दिग्दर्शित 'झिम्मा' या चित्रपटात सिद्धार्थ चांदेकर, निर्मिती सावंत, सुहास जोशी, सुचित्रा बांदेकर, क्षिती जोग, सोनाली, सायली संजीव, मृण्मयी गोडबोले यांच्या प्रमुख भूमिका आहेत. या चित्रपटाचे लेखन इरावती कर्णिक यांनी केले असून छायाचित्रीकरण संजय मेमाणे यांनी केले आहे. क्षिती जोग यांच्यासोबत स्वाती खोपकर, अजिंक्य ढमाळ, विराज गवस, उर्फी काझमी, सनी शाह यांनी या चित्रपटाची निर्मिती केली आहे.