मुंबई - ओटीटी प्लॅटफॉर्ममुळे (ott platfom) वेगवेगळ्या प्रकारच्या मालिका आणि चित्रपट आपल्या भेटीला आले आहेत. त्यात अनेक नाविन्यपूर्ण विषय हाताळण्यात आले आहेत. कोरोनामुळे एकीकडे मनोरंजन क्षेत्रावर आर्थिक संकट असताना दुसरीकडे ओटीटीनं कित्येक निर्माते आणि दिग्दर्शकांना मोठा मदतीचा हात दिला आहे. आशयपूर्ण आणि प्रेक्षकांच्या मनाला भिडतील असे विषय निर्माते प्रेक्षकांपुढे सादर करत आहे. केवळ हिंदीतच नाहीतर मराठीमध्ये देखील हटक्या विषयांची मांडणी करणारे चित्रपट आणि मालिका समोर येत आहे. (marathi show shantit kranti bhartiy digital party new web series on sony liv yst88)

समांतर (samantar) नंतर सिटी ऑफ ड्रीम्सचे (city of dreams) प्रेक्षकांना वेध लागले आहे. ही मालिका मराठी बरोबरच हिंदीमध्ये देखील प्रेक्षकांना पाहता येणार आहे. मात्र सध्या एका शो च्या ट्रेलरची सोशल मीडियावर जोरदार चर्चा आहे. ती म्हणजे 'शांतीत क्रांती' च्या ट्रेलरची. सध्या हा ट्रेलर मोठ्या प्रमाणात व्हायरल झालाय. तो प्रेक्षकांच्या पसंतीसही पडला आहे. एका आगळ्या वेगळ्या विषयाची मांडणी त्यात करण्यात आली आहे. ट्रेलरमध्ये असलेले संवाद खासकरुन तरुणांना आवडल्याचे दिसून आले आहे. काही वर्षांपूर्वी दिल चाहता है हा फरहान अख्तरचा एक चित्रपट आला होता. त्यात तीन मित्रांची गोष्ट सांगितली होती. शांतीत क्रांतीमध्ये देखील तशाच प्रकारची गोष्ट आहे.

मित्रत्व, प्रवासाच्या माध्यमातून स्वताचा घेतलेला शोध. ही त्या शो ची मुख्य संकल्पना आहे. श्रेयस, प्रसन्न आणि दिनार अशी त्या मित्रांची नावे आहेत. आपण ज्यावेळी तो ट्रेलर पाहतो तेव्हा त्यातून त्यांची धमाल आपल्याला पाहायला मिळते. त्यांनी आखलेली गोव्याची ट्रीप ही त्यांच्या आयुष्याला लागणारं वळण आहे. याची पुसटशी कल्पना आपल्याला येते.

भारतीय डिजिटल पार्टी अर्थात भाडिपानं या शो ची निर्मिती केली आहे. सारंग साठे आणि पॉला मॅकग्लिन यांचे दिग्दर्शन असलेल्या या शोमध्ये अभय महाजन (श्रेयस), ललित प्रभाकर (प्रसन्न) आणि आलोक राजवाडे (दिनार) आपल्याला भेटणार आहेत.