ब्रिटनचे राजपुत्र हॅरी आणि त्यांची पत्नी मेगन मार्कल यांनी प्रसिद्ध अमेरिकन टीव्ही सूत्रसंचालिका ओप्रा विनफ्रेला दिलेली मुलाखत चांगलीच चर्चेत आली आहे. या मुलाखतीत मेगनने ब्रिटनच्या राजघराण्याविषयी बरेच खुलासे केले आहेत. मेगनने ब्रिटीश मीडियाच्या नकारात्मक कव्हरेजसह केट मिडलटनबाबत असलेल्या अफवांवरही स्पष्टीकरण दिलं. राजघराण्यात असूनदेखील एकटं वाटत असल्याचं तिने मुलाखतीत बोलून दाखवलं. इतकंच नव्हे तर मुलाच्या वर्णावरूनही राजघराण्यात चिंता होती, असा खुलासाही तिने केला. 

"माझ्या मुलाच्या वर्णावरून राजपरिवारातील सदस्यांमध्ये चिंतेचं वातावरण होतं. याविषयी कुटुंबातल्या सदस्यांनी प्रिन्स हॅरीशी चर्चादेखील केली होती", असं ती म्हणाली. मात्र त्या सदस्यांची नावं सांगण्यात तिने नकार दिला. शाही परिवारातून बाहेर पडल्यानंतर त्यांनी सुरक्षाही नाकारली होती, असंही तिने स्पष्ट केलं. 

"एकवेळ अशी आली होती, की मी मानसिकदृष्ट्या पूर्णपणे खचली होती. माझ्या मनात आत्महत्येचाही विचार आला होता. सोशल मीडियावर माझ्याविषयी आपत्तीजनक कमेंट्स केल्या जात होत्या", असं मेगनने सांगितलं. अशा प्रसंगी काय करावं आणि मेगनची मदत कशी करावी हे समजत नसल्याचं प्रिन्स हॅरीनं सांगितलं. 

हेही वाचा : हेलिकॉप्टर प्रवास आणि बरंच काही.. रसिका सुनीलचं फिल्मी प्रपोजल

मेगनच्या या मुलाखवतीवर सध्या कोणतीही प्रतिक्रिया न देण्याचा निर्णय महाराणी एलिजाबेथ यांनी घेतला आहे. 'द टेलिग्राफ'ने दिलेल्या वृत्तानुसार, शाही स्टाफने मेगन-हॅरीची ही मुलाखत पाहिली आणि त्याबद्दल त्यांनी शाही परिवाराला सांगितलं. त्याचप्रमाणे महाराणीने प्रिन्स चार्ल्स आणि प्रिन्स विलियम्स यांच्याशीही याबाबत चर्चा केली आहे. 

प्रिन्स हॅरी आणि मेगन मार्कल हे दुसऱ्या अपत्याच्या स्वागतासाठी सज्ज झाले आहेत. या शाही जोडप्याला याआधी दीड वर्षाचं एक अपत्य असून त्याचं नाव आर्ची हॅरिसन माऊंटबॅटन-विंडसर असं आहे.