मार्च महिना सुरु होताच उत्सुकता लागते ती होळी सणाची. हा सण लहांनापासून मोठ्यापर्यंत सर्वांनाच आवडतो. प्रत्येक भागात हा सण वेगवेगळ्या पद्धतिने खेळला जातो. कुठे रंगपचंमी तर कुठे धुलिवंदन..या वर्षी होळी 8 मार्चला म्हणजेच बुधवारी साजरी केली जाईल. सर्व सामान्याबरोबरचं बॉलिवूडपासून ते टीव्हीपर्यंतचे स्टार्सही थाटामाटात होळी साजरी करतात.

आपल्याकडे होळीची अनेक गाणीही प्रसिद्ध आहेत. बॉलिवूड चित्रपटांमध्ये होळी खेळताना दाखविण्यात आले आहे. बॉलीवूड इंडस्ट्री आणि होळी यांचे खूप घट्ट नाते आहे. अनेक चित्रपटात होळी साजरी करतांनाचे सीन्स आपण पाहिले आहेत. मात्र चित्रपटांमध्ये होळीचा ट्रेंड कसा सुरू झाला आणि तो कोणी सुरु केला? हे जाणुन घेऊयात

बॉलीवूडमध्ये ब्लॅक अँड व्हाइट सिनेमाच्या काळापासून होळीचा सण मोठ्या उत्साहात साजरा केला जात आहे. 'औरत' हा चित्रपट स्वातंत्र्यापूर्वी म्हणजे 1940 साली प्रदर्शित झाला होता, ज्यामध्ये होळीचा सण पहिल्यांदाच दाखवण्यात आला होता, परंतु हा ब्लॅक अँड व्हाईट चित्रपट असल्यामुळे या चित्रपटात खरे रंग पाहायला मिळाले नाहीत.

हा चित्रपट मेहबूब खान यांनी दिग्दर्शित केला होता. 1957 मध्ये मेहबूब खान यांनी 'औरत' चित्रपटाचा रिमेक बनवला, ज्याचे नाव मदर इंडिया होते. हा चित्रपट सुपरहिट ठरला अजुनही हा चित्रपट लोकप्रिय आहे.

होळीचे रंग रंगीबेरंगी पडद्यावर फक्त मेहबूब खानच्या 'मदर इंडिया' या चित्रपटात दिसले. नर्गिस, राजेंद्र कुमार, सुनील दत्त सारखे स्टार्स मदर इंडियामध्ये दिसले होते.

मदर इंडियाच्या आधीही रंगीत पडद्यावर अनेक चित्रपट प्रदर्शित झाले होते, त्यापैकी मेहबूब खान यांचा एक चित्रपट होता, ज्याचे नाव आन होते. या चित्रपटात दिलीप कुमार, निम्मी, नादिरा आणि प्रेमनाथ सारखे कलाकार दिसले. हा चित्रपट 1952 साली प्रदर्शित झाला होता आणि मेहबूब खान यांनी या चित्रपटात होळीचा सीन दाखवला होता.

बॉलीवूडमध्ये होळीचा ट्रेंड सुरू करण्यात मेहबूब खान यांची फार महत्त्वाची भूमिका असल्याचे म्हटल्यास चुकीचे ठरणार नाही. मेहबूब खान यांच्यामुळे आज चित्रपटांमध्ये होळीचे रंग पाहायला मिळतात. आजही चित्रपटात मोठ्या उत्साहात होळी सण साजरा होताना दिसतो.