Utkarsh Shinde on Maharashtra Politics News: आज दुपारपासूनच महाराष्ट्राच्या राजकारणात अशा घडामोडी घडल्या की त्याने मागच्या वर्षी राजकारणात झालेल्या सत्तांतरणाचा दुसरा भागच आज रिलिज झाला की काय असं चित्र दिसतंय.

राष्ट्रवादीचे आघाडीचे नेते आणि राज्याचे विरोधी पक्ष नेते अजित पवार यांनी बंड केले. त्यामुळे राज्यात राजकीय भुकंप झाला.

त्यानंतर अजित पवार यांनी मुख्यंमत्री एकनाथ शिंदे आणि उपमुख्यंमत्री देवेंद्र फडणवीस यांच्या उपस्थितीत दुसऱ्या उपमुख्यमंत्रीपदाची शपथ घेतली आहे.

त्यानंतर राज्याच्या राजकारणात गोंधळच उडाला. आता या राजकीय घडामोडीवर अनेक राजकिय नेत्यांनीही प्रतिक्रिया दिली आहे. त्यात उद्धव ठाकरे, शरद पवार , राज ठाकरे, संजय राऊत यांनी प्रतिक्रिया दिली आहे.

त्यातच आता या राजकिय परिस्थीतीवर मनोरंजन विश्वातील कलाकारही प्रतिक्रिया देत आहेत. त्यात आता उत्कर्ष शिंदे यानेही सोशल मिडियावर पोस्ट शेयर करत प्रतिक्रिया दिली आहे.

ज्येष्ठ गायक प्रल्हाद शिंदे यांचा नातू आणि आनंद शिंदे यांचा मुलगा उत्कर्ष शिंदे हा बिग बॉस मराठीतून त्याच्या दमदार खेळाने प्रेक्षकांच्या मनात पोहोचला.

उत्कर्ष शिंदेने दोन पोस्ट केल्या आहेत. आता त्यात पहिले त्याने 'मतदारांच्या बोटाला शाही नाही आता चुनाच चुना' अशी मार्मिक पोस्ट शेयर केली आहे. तर राष्ट्रवादीच्या नेत्या सुप्रिया सुळे यांच्यासोबतचा फोटो देखील शेयर केला आहे.

महाराष्ट्राच्या मंत्रिमंडळात पुन्हा तीन पक्षाचे सरकार आले आहेत. त्यात शिवसेना, भाजप आणि राष्ट्रवादी अशा तीन पक्षाचा सामावेश आहे.

अजित पवार यांच्यासह छगन भुजबळ, दिलीप वळसे पाटील, हसन मुश्रीफ, धर्माराव अत्राम, धनजंय मुंडे, आदिती तडकरे, संजय बनसोडे, अनिल पाटील या आमदारांनी मंत्रिपदाची शपथ घेतली आहे.