रणबीर कपूर(Ranbir Kapoor) आणि आलिया भट्ट(Alia Bhatt) यांच्या लग्नाची बातमी गेल्या काही दिवसांत वाऱ्यासारखी पसरली आहे. सोशल मीडियावर तर या बातमीची एक वेगळीच जादू पहायला मिळत आहे. कपूर आणि भट्ट कुटुंबाकडून अद्याप यावर काही अधिकृतरित्या बोललं गेलं नसलं तरी लग्नाच्या वेन्यूपासून,रणबीरच्या बॅचलर पार्टीपर्यंत ते अगदी दोघांच्या हनीमून पर्यंतच्या सगळ्या बातम्या मीडियाच्या माध्यमातून आलिया-रणबीरच्या चाहत्यांपर्यंतं पोहोचत आहेत. दरम्यान आता नीतू कपूर यांनी मुलगा रणबीर कपूर सोबत करत असलेल्या एका नवीन प्रोजेक्टची माहिती दिली आहे. हे एका जाहिरातीचं शूट आहे,ज्याच्या शूटिंगच्या सेटवरचा एक फोटो नीतू कपूर यांनी त्यांच्या अधिकृत सोशल मीडिया अकाऊंटवर शेअर केला आहे.

रणबीर सोबतचा फोटो पोस्ट करीत नीतू यांनी लिहिलं आहे,''अपने जाने-जिगर के साथ अॅड शूट''. या फोटोला अनेक सेलिब्रिटींनी लाइक केलं आहे. दिया मिर्झानं हार्ट इमोजी पोस्ट केलाय तर करिना कपूरची नणंद सबा अली खाननं लिहिलं आहे-'माशाहल्ला'. सोफी चौधरीनं लव्ह इमोजी पोस्ट केली आहे. तर आलियाची आई आणि रणबीरच्या होणाऱ्या सासुबाई सोनी राझदान यांनी 'वॉव्व' लिहीत फोटोला पसंती दिली आहे.

सूत्रांच्या माहितीनुसार रणबीर कपूर आणि आलिया भट्ट यांचं लग्न १७ एप्रिल रोजी मुंबईत होत आहे. लग्नानंतर दोघेही आपापल्या कामात बिझी होणार असल्याचं बोललं जात आहे. आलिया आणि रणबीर पहिल्यांदा 'ब्रह्मास्त्र' सिनेमात एकत्र पडद्यावर दिसणार आहेत. हा सिनेमा यावर्षी प्रदर्शित होणार असल्याचं बोललं जात आहे. रणबीरनं याआधी २०१३ मध्ये 'बेशरम' या सिनेमात आपली आई नीतू कपूरसोबत काम केलं होतं,या सिनेमात ऋषि कपूर देखील होते. रणबीर २०१८ मध्ये 'संजू' सिनेमात दिसला होता. त्यानंतर आता थेट 'ब्रह्मास्त्र' मध्ये दिसेल. रणबीर काही दिवसांपूर्वी ऋषि कपूर यांचा मृत्यूपश्चात ओटीटीवर प्रदर्शित झालेला 'शर्माजी नमकीन' हा सिनेमा प्रमोट करताना दिसला होता.