आपल्या सुमधूर आवाजाने कानसेनांना मंत्रमुग्ध करणारी गायिका म्हणजे नेहा कक्कर. बॉलिवूडमधील अनेक गाण्यांना आपला आवाज देणारी नेहा सध्या इंडियन आयडॉल १२ या शोच्या परिक्षकपदाची जबाबदारी पार पाडत आहे. लवकरच या कार्यक्रमात होळी स्पेशल भाग रंगणार आहे. त्यापूर्वी या भागाचा एक प्रोमो सोशल मीडियावर चर्चेत आला आहे. या व्हिडीओमध्ये नेहाने एक महत्त्वाची घोषणा केली आहे. यापुढे ती कोणत्याही रिअ‍ॅलिटी शोमध्ये सहभाग घेणार नसल्याचं तिने स्पष्ट केलं आहे. त्यामुळे सध्या सोशल मीडियावर नेहा कक्कर चर्चेत आली आहे.

चर्चेत येत असलेल्या प्रोमोमध्ये नेहाने या शोमधील निहाल आणि पवनदीपसोबत ‘नैना’, ‘प्यार दो प्यार लो’ आणि ‘बद्री की दुल्हनिया’ या गाण्यांवर ताल धरला. विशेष म्हणजे यावेळी प्रेक्षकांनी दिलेली दाद पाहून नेहा भावूक झाली आणि तिने हा शो तिच्यासाठी खास असून हा शो सोडून अन्य रिअ‍ॅलिटी शो करणार नाही असं तिने सांगितलं.

हेही वाचा : प्रेग्नंसीनंतरच्या कंबरदुखीला 'गुडबाय' करायचं असेल तर आहारात करा 'या' पदार्थांचा समावेश

"इंडियन आयडॉल माझ्यासाठी खूप खास आहे. या शोने मला खूप काही दिलं आहे. त्यामुळे हा शो सोडून मी अन्य कोणताही कार्यक्रम करु शकत नाही. या शोच्या संपूर्ण टीमे खूप कष्ट करुन हा शो तयार केला आहे. त्यामुळे त्यांच्या मेहनतीमुळेच तो कलाविश्वाच्या इतिहासातील एक खास शो ठरला आहे", असं नेहा म्हणाली.

दरम्यान, इंडियन आयडॉल १२ हा शो छोट्या पडद्यावरील लोकप्रिय शो पैकी एक आहे. आतापर्यंत या शोमुळे कलाविश्वाला अनेक गायक मिळाले आहेत.