अभिनेत्री निवेदिता सराफ आता एका नव्या 'आसावरी'च्या रुपात प्रेक्षकांच्या भेटीला आल्या आहेत. 'अग्गंबाई सासूबाई' ही मालिका आता 'अग्गंबाई सूनबाई' या नावाने प्रसारित होत असून त्यातील भूमिकांमध्येही बरेच बदल झाले आहेत. अत्यंत प्रेमळ आणि लाघवी असणारी आसावरी आता खाष्ट सासू झाली आहे. तिचा स्वत:चा व्यवसाय असून बबड्या त्यामध्ये पगारी नोकर म्हणून काम करतोय. या नव्या मालिकेतील भूमिकेविषयी निवेदिता या नुकत्याच दिलेल्या एका मुलाखतीत मोकळेपणाने व्यक्त झाल्या. त्यांच्या अभिनयाबद्दल अशोक सराफ यांची काय प्रतिक्रिया असते हेसुद्धा त्यांनी या मुलाखतीत सांगितलं. "आजही भूमिका साकारताना माझ्या पोटात गोळा येतो", असं त्या म्हणाल्या. 

"जे तुम्ही नाही आहात, ते साकारण्यात फार मजा येते. या नव्या मालिकेत काही वर्षांचा लीप दाखवलाय आणि त्यादरम्यान भूमिका बदलल्या आहेत. अशा विविध भूमिका साकारायला मिळतात, त्यामुळे एक अभिनेत्री म्हणून मी खूप समाधानी आहे. या बदललेल्या आसावरीसाठीही कुटुंब महत्त्वाचं आहे. फक्त हा कुटुंब तिच्या चार लोकांपुरता आता मर्यादित नाही. आता तिला सगळ्यांना घेऊन पुढे जायचंय. ती थोडी कठोर झाली आहे. आसावरी बदलली असल्यामुळे शुभ्रासुद्धा आता तशीच राहिली नाही. आसावरीला तिला बदलायचं आहे. आशुतोषने बबड्याच्या भूमिकेला कुठच्या कुठे नेऊन ठेवला होता. तेजश्री प्रधानसोबत माझी खूप चांगली मैत्री झाली. ही मैत्री पुढेही तशीच कायम राहील", असं त्या 'मुंबई तक'ला दिलेल्या मुलाखतीत म्हणाल्या. 

हेही वाचा : 'झिम्मा' ट्रेलरमधील सायली संजीवच्या 'त्या' बोल्ड सीनची चर्चा 

सोशल मीडियावरील ट्रोलिंगविषयी त्या पुढे म्हणाल्या, "मी ट्रोलिंगचा फार विचार करत नाही. आजकाल सोशल मीडियावर माणसं फार जजमेंटल झाली आहेत. या वयात मी पैशांसाठी काम करत नाहीये, तर एंजॉय करण्यासाठी काम करतेय. प्रत्येक भूमिका साकारताना मला थोडंसं टेन्शन असतंच. लोकं म्हणतात निंदकाचे घर असावे शेजारी, पण मी तर निंदकाशीच लग्न केलंय. रोज भेटल्यावर ते माझी कानउघडणी करतात आणि ते काय बोलतील या विचाराने माझ्या पोटात गोळा येतो. पण ते माझे गुरू आहेत. त्यामुळे त्यांची प्रतिक्रियासुद्धा माझ्यासाठी खूप महत्त्वाची आहे."

१५ मार्चपासून ही नवी मालिका प्रेक्षकांच्या भेटीला आली आहे. यामध्ये निवेदिता सराफ यांच्यासोबत गिरीश ओक, उमा पेंढारकर आणि अद्वैत दादरकर मुख्य भूमिका साकारत आहेत.