ऑस्कर विजेते कॅनेडियन दिग्दर्शक पॉल हॅगिसबद्दल (Oscar Winners Paul Haggis) मोठी बातमी समोर आलीय. पॉलला दक्षिण इटलीमध्ये (Italy) लैंगिक अत्याचारप्रकरणी अटक करण्यात आली होती. आता याबाबत एक मोठं अपडेट समोर आलंय. मीडिया रिपोर्ट्समधून मिळालेल्या माहितीनुसार, पॉलनं स्वतःवरील हे गंभीर आरोप फेटाळून लावल्याचं समोर आलंय. त्यांनी स्पष्टीकरण देताना स्वतःवरील आरोप फेटाळून लावले आहेत.

2017 मध्ये चित्रपट, टेलिव्हिजन कथा लेखक, निर्माता आणि दिग्दर्शक पॉल हॅगिस यांना लैंगिक छळाच्या आरोपाखाली इटलीमध्ये अटक करण्यात आली. पॉलवर दक्षिण इटलीतील ओस्तुनी इथं एका मुलीवर दोन दिवस बलात्कार केल्याचा आरोप आहे. त्यामुळं त्याला अटक करण्यात आलीय. मीडिया रिपोर्ट्सनुसार, आता पॉल हॅगिसचं वक्तव्य समोर आलंय. त्यांनी स्वत:वरील छळाचे आरोप खोटे असल्याचं म्हटलंय. पॉलनं आपल्या स्पष्टीकरणात मी निर्दोष असल्याचं म्हटलं असून हे सर्व आरोप चुकीचं असल्याचंही ते म्हणाले. या प्रकरणाची लवकरात-लवकर चौकशी करा. कारण, मी असं काहीही केलेलं नाहीय. पॉल हॅगिस यांनी हे विधान त्यांच्या वकिलामार्फत सांगितलंय.

पॉल हॅगिस कोण आहे?

69 वर्षीय पॉल हॅगिस हे ऑस्कर विजेते आहेत. क्रॅश या प्रसिद्ध चित्रपटासाठी त्यांना ऑस्कर पुरस्कारानं सन्मानित करण्यात आलंय. ब्रिंडिसी प्रांतातील ओस्टुनी शहरात (Ostuni Italy) मंगळवारपासून सुरू होणाऱ्या एलोरा फिल्म फेस्टिव्हलमध्ये हॅगिस प्रमुख पाहुणे म्हणून उपस्थित राहणार होते. या सोहळ्यापूर्वी पीडिता पॉल हॅगिससोबत राहत होती, असं सांगितलं जातंय.

नेमकं काय आहे संपूर्ण प्रकरण?

पॉल हॅगिस आणि पीडित तरुणी या प्रकरणाच्या काही काळापूर्वी एकमेकांना भेटले होते. त्यानंतर पॉलनं पीडित मुलीसोबत जबरदस्तीनं शारीरिक संबंध ठेवण्याचा प्रयत्न केला. एवढंच नाही तर लैंगिक अत्याचारानंतर पीडितेवर वैद्यकीय उपचार घेण्यासाठी दबावही टाकण्यात आला. त्यानंतर पीडितेनं त्याच्याविरोधात तक्रार दाखल केली. आता हे आरोप पॉल हॅगिस यांनी त्यांच्या वकिलामार्फत फेटाळून लावले आहेत.