pankaja munde : गेली काही दिवस सुबोध भावेच्या 'बस बाई बस' या आगामी कार्यक्रमाची भलतीच चर्चा आहे. झी मराठी वाहिनीवरील 'बस बाई बस' या नव्या मालिकेत महिला कलाकार, राजकारणी सहभागी होतात यावेळी त्यांना इतर महिलांच्या मनातले प्रश्न विचारले जातात. अशी भन्नाट संकल्पना असणाऱ्या कार्यक्रमाचे सूत्रसंचालन सुबोध भावे (subodh bhave) करत आहे. या कार्यक्रमात या आधी राष्ट्रवादी पक्षाच्या खासदार सुप्रिया सुळे, उपमुख्यमंत्री देवेंद्र फडणवीस यांच्या पत्नी अमृता फडणवीस सहभागी झाल्या होत्या. आता भाजप आमदार पंकजा मुंडे सहभागी झाल्या आहेत. याचा एक भन्नाट प्रोमो नुकताच समोर आला आहे. ज्यामध्ये पंकजा यांना काही राजकीय तर काही खासगी प्रश्न विचारण्यात आले आहेत. यावेळी पंकजा यांनी मोठा राजकीय गौप्यस्फोट केला. (pankaja munde participate in bus bai bus show on zee marathi she talks about father gopinath munde advice about politics)

पंकजा मुंडे सहभागी झालेल्या 'बस बाई बस' च्या आगामी भागाचा प्रोमो नुकताच प्रदर्शित झाला आहे. यावेळी सुबोध भावे त्यांना एक भन्नाट प्रश्न विचारतात. सुबोधने त्यांना विचारलं की, 'तुम्ही कधी दुसऱ्या पक्षाचे आमदार कधी फोडलेत का?' यावर पंकजा ताईंनी मोठा राजकीय गौप्यस्फोट केला. तया म्हणाल्या,'होय.. मी आमदार फोडले आहेत.' त्यावर सुबोध म्हणतो, कोण आणि कधी ?.. त्यावर पंकजा म्हणतात, 'सगळंच सांगत बसले तर एक वेगळा भाग आपल्याला शूट करावा लागेल. पण अनेक लोकांनी आज आमच्याकडे म्हणजे भारतीय जनता पक्षात प्रवेश केला आहे. माझ्या बीड जिल्ह्यात कित्येक राष्ट्रवादी, कॉँग्रेसचे नेते, कार्यकर्ते आमच्याकडे आले आहेत.' असे त्या म्हणाल्या.

पुढे त्या म्हणाल्या, 'आज ज्या पदावर मी काम करत आहे. तिथे या गोष्टी होतातच. राजकारणात आले तेव्हा माझ्या वडिलांनी एकच गोष्ट सांगितली होती. ती म्हणजे कायम बेरजेचं राजकारण करायचं, वजाबाकीचं नाही. जर आपल्याकडे बेरीज होत असेल तर काही हरकत नाही. कारण राजकारणात आणि युद्धात जिंकणं महत्वाचं असतं. त्यामुळे आपल्याला शोभेल असे लोक मी पक्षात घेत असते. आमच्याकडे अर्धेलोक बाहेरूनच आले आहेत. त्यामुळे हे सुरूच राहतं' असं मोठा गौप्यस्फोट पंकजा मुंडे यांनी केला.