oscars : जागतिक स्तरावर सर्वोच्च मानला जाणारा ऑस्कर पुरस्कार नुकताच लॉस एंजेलिस येथे पार पडला. ऑस्करच्या या ९४ व्या पुरस्कार सोहळ्याला एका दुर्दैवी घटनेने गालबोट लागले. भर सोहळ्यात एक विनोद खटकल्याने अभिनेता विल स्मिथ याने विनोदी कलाकार ख्रिस रॉक याच्या कानाखाली मारली. या घटनेचा सर्व स्तरातून निषेध केला गेला. ऑस्करचे आयोजन करणाऱ्या 'द अकादमी'ने देखील या घटनेवर कारवाई होणार असल्याचे जाहीर केले. या घटनेचे पडसाद आता जगभरात उमटत आहेत. एका विनोदी कलाकाराच्या अभिव्यक्तीवर, खुलेपणावर अंकुश लावला जात आहे का, अशा चर्चांना पेव फुटले आहे.

बॉलिवूड मधील दिग्गज अभिनेते आणि विविध विषयांवर आपले परखड मत मांडणारे परेश रावल (paresh rawal) यांनीही ट्विट करत या घटनेचा निषेध केला आहे. त्यांनी त्यांच्या खास उपरोधिक शैलीतून विनोदी कलाकारांची बाजू राखली आहे. ‘आजकाल कॉमेडियन्सला सर्वत्रच धोका आहे. मग तो क्रिस असो किंवा झेलेन्स्की’ अशी धारदार टीका परेश रावल यांनी केली आहे. ऑस्कर प्रकरणावर बोलताना त्यांनी थेट रशिया युक्रेन युद्धाशी (russia ukrain crisis) या घटनेचा संबंध जोडला आहे.

हा संबंध जोडण्यामागे कारणही तसेच आहे. या ट्विटमध्ये त्यांनी विनोदी कलाकार ख्रिस रॉक सह युक्रेनचे राष्ट्राध्यक्ष वोलडिमिर झेलेन्स्की यांचा उल्लेख केला आहे. झेलेन्स्की हे युक्रेनचे राष्ट्राध्यक्ष होण्यापूर्वी लोकप्रिय विनोदी अभिनेते होते. सध्या सुरु असलेल्या रशिया युक्रेन युद्धाने जगाला हादरवून सोडले आहे. याचे पडसाद सर्वत्र उमटत आहेत. राष्ट्राचा राष्ट्राध्यक्ष असलेला एक कलाकार माणूस आज कशा पद्धतीने संकटात अडकला आहे याची जाणीव परेश रावल यांनी करून दिली. म्हणूनच अत्यंत सूचक पद्धतीने त्यांनी हे ट्विट केले आहे.

दरम्यान विल स्मिथने इन्स्टाग्राम ख्रिस रॉकची माफी मागितली आहे. 'हिंसा ही विषारी आणि विनाशकारी आहे. ऑस्कर पुरस्कार सोहळ्यात मी केलेले वर्तन अस्वीकार्य आणि अक्षम्य होते. माझी मस्करी करणं किंवा माझ्या कामाची खिल्ली उडवण्यापर्यंत ठीक होतं पण जेडाच्या वैद्यकीय स्थिती समजून न घेता तिची खिल्ली उडवल्याने माझा सहनशक्तीचा अंत झाला. मी भावनेच्या भरात हे पाऊल उचलले. ख्रिस या प्रकरणानंतर मला तुझी जाहीरपणे माफी मागायची आहे. मी माझी हद्द ओलांडली. मी चुकीचा होतो. मला याची लाज वाटत आहे,' असे विल स्मिथने म्हटले आहे.