पारंपरिक कोळी गाण्यांचा बादशाह म्हणून ओळखले जाणारे काशीराम चिंचय (Kashiram Chinchay) यांचं निधन जालं. ते ७१ वर्षांचे होते. गेल्या काही दिवसांपासून ते आजारी होते. केईएम रुग्णालयात उपचारादरम्यान त्यांची प्राणज्योत मालवली. त्यांच्या पश्चात पत्नी हेमा, मुलगा सचिन आणि तीन विवाहित कन्या असा परिवार आहे. कोळी गीतं सातासमुद्रापार लोकप्रिय करणारे लोकशाहीर म्हणून त्यांची ओळख आहे.

काशीराम चिंचय यांच्यावर सुरुवातीला अंधेरीतील ब्रह्मकुमारी रुग्णालयात उपचार सुरू होते. मात्र त्यानंतर त्यांना केईएम रुग्णालयात हलवण्यात आलं. केईएम रुग्णालयात त्यांनी शुक्रवारी पहाटे अखेरचा श्वास घेतला. डोल डोलतंय वाऱ्यावर, डोंगराच्या आडून एक बाई चांद उगवला, वेसावची पारू, हिच काय गो गोरी गोरी पोरी, मी हाय कोळी, सन आयलाय गो यांसारख्या अनेक कोळीगीतांचे ते गीतकार होते.

काशीराम यांच्या निधनानंतर सोशल मीडियावर पोस्ट लिहित अनेकांनी शोक व्यक्त केला. 'असे कलाकार पुन्हा होणे नाही, कोळी संस्कृतीचा एक बहुमोल मणी आज हरपला,' अशा शब्दांत अनेकांनी भावना व्यक्त केल्या.